31 ოქტომბერს ქუთაისში, „სამედიცინო კორპორაცია ევექსი“ დასავლეთ საქართველოს მასშტაბით ყველაზე დიდ და თანამედროვედ აღჭურვილ ონკოლოგიის ცენტრში სტაციონალურ განყოფილებას გახსნის.
„ონკოლოგიის ცენტრის“ სტაციონალური განყოფილება 50 საწოლზეა გათვლილი და პაციენტებს ეფექტურ მკურნალობაზე ორიენტირებული კვალიფიციური მედპერსონალი მოემსახურება. უახლესი სამედიცინო აპარატურით აღჭურვილ საოპერაციო ბლოკებში განხორციელდება ონკოლოგიური პაციენტების ქირურგიული მკურნალობა, ჩატარდება ლაპარასკოპიული ოპერაციები, ენდოსკოპიური ოპერაციები უროლოგიაში, რომელიც თანამედროვე ბიპოლარული ელექტრო-ქირურგიული ბლოკის გამოყენებით შესრულდება.
ცენტრში პაციენტებს ონკოლოგიური დაავადებების მკურნალობის კურსს ზედამხედველობას ევროპასა და ამერიკაში მოღვაწე ქართველი და უცხოელი ექიმები უწევენ: ქრისტინა კილი - სხივური თერაპიის მიმართულებით ჩიკაგოდან მოწვეული რადიოლოგი, ზაზა უჯმაჯურიძე - დანიაშნი მოღვაწე ონკოლოგი, გოჩა ხელაშვილი - ჩიკაგოში მოღვაწე სხივური თერაპიის სამედიცინო ფიზიკოსი, აიდა გოზალოვა - გერმანიიდან მოწვეული ონკო-ჰემატოლოგი.
ქუთაისის ონკოლოგიის ცენტრი ერთადერთი სამედიცინო დაწესებულებაა იმერეთის რეგიონში, სადაც 2015 წლიდან ფუნქციონირებს ხაზოვანი ამაჩქარებელი აპარატი, 2017 წელს კი ცენტრმა დააინსტალირა კიდევ ერთი უახლესი ხაზოვანი ამაჩქარებელი Truebeam-ი, რომელიც რთულად მისადგომ სიმსივნურად დაზიანებულ უბნებში მიზნობრივ დასხივებას ახორციელებს.
დღეიდან, დასავლეთ საქართველოში მცხოვრები ონკოლოგიური პაციენტები რეგიონიდან გაუსვლელად მიიღებენ ონკოლოგიური მკურნალობის სრულ სპექტრს.
