სიმონეთის სამხედრო პოლიგონზე სამხედრო მოსამსახურე დაშავდა. 33 წლის ვალერი ჭანტურიძეს ხელი დაუზიანდა და მოგვიანებით კიდურის ამპუტაცია ჩაუტარდა.
ჯარისკაცი ქუთაისში, რეფერალურ ჰოსპიტალში მკურნალობს, როგორც ექიმები აცხადებენ, მისი ჯანმრთელობის მდგომარეობა სტაბილურია.
დაშავებულის დედის განცხადებით, რომ არ ეუბნებიან, თუ რა მოხდა ჯარში.
მისი თქმით, დაშავებული სამხედრო საქართველოს შეიარაღებულ ძალებში 12 წელზე მეტია მსახურობს, ის სხვადასხვა დროს ავღანურ მისებში იღებდა მონაწილეობას.
"მეუბნებიან გმირის დედა ხარო, არ მინდა ამნაირი გმირობა, ავღანეთში ან ცხინვალში რომ მოსვლოდა ხმას არ ამოვიღებდი, აქ უბრალო ადგილზე მიკლავენ შვილს და რა მოხდა ვერ გავიგე”,-აცხადებს სამხედროს დედა.
თავდაცვის სამინისტროს ინფორმაციით, მომხდარზე გამოძიება სამხედრო პოლიციამ დაიწყო. მათივე ინფორმაციით, ვალერი ჭანტურიძე სამიზნე სროლებს ახორციელებდა და უეცარი სროლის შედეგად მარცხენა ხელის მტევანი დაიზიანა. დანიშნულია ექსპერტიზა. გამოძიება კი 124-ე მუხლით მიმდინარეობს, რაც ჯანმრთელობის გაუფრთხილებლობით დაზიანებას გულისხმობს.
