საქართველოს პრემიერ-მინისტრი გიორგი კვირიკაშვილი ესპანეთში განვითარებულ მოვლენებს Twitter-ის პირად გვერდზე ეხმაურება და აღნიშნავს, რომ საქართველო ესპანეთის ტერიტორიულ მთლიანობას მხარდაჭერას უცხადებს.
„საქართველო მტკიცედ უჭერს მხარს ჩვენი მეგობრისა და პარტნიორის, ესპანეთის სუვერენიტეტს და ტერიტორიულ მთლიანობას“, - დაწერა გიორგი კვირიკაშვილმა.
ცნობისთვის, ესპანეთის ხელისუფლებამ კატალონიის მთავრობა გადააყენა.
ესპანეთის მთავრობის გადაწყვეტილებით, კატალონიის რეგიონში ვადამდელი არჩევნები 21 დეკემბერს გაიმართება. გადაწყვეტილება რეგიონში ნორმალური ვითარების აღდგენას ისახავს მიზნად.
მთავრობის გადაწყვეტილებით, დათხოვნილია კატალონიის პარლამენტი, რომელმაც რამდენიმე საათის წინ, კატალონიის დამოუკიდებლობა გამოაცხადა.
