მეუფე დიმიტრი შიოლაშვილის განცხადებით, დეკანოზი გიორგი მამალაძე საკმაოდ მძიმე მდგომარეობაში იმყოფება. ამის შესახებ მან ე.წ. მატროსოვის საპყრობილიდან გამოსვლის შემდეგ ჟურნალისტებს განუცხადა.
„საკმაოდ მძიმე მდგომარეობაშია და თავისთავად, ეს გასაკვირი არ იყო. მამა გიორგი არის ისევ თავის აზრზე, რომ ეს იყო შეთქმულება ჩემს წინააღმდეგ. ჩვენ ამაზე საკმაოდ დიდხანს ვისაუბრებთ. მე ვფიქრობ, რომ ეს იყო შეთქმულება არა მხოლოდ ჩემს წინააღმდეგ, არამედ ეკლესიის წინააღმდეგ და ის, ვინც ეს დაგეგმა არის ძალიან ბოროტი ადამიანი“, - განაცხადა მეუფემ.
როგორც მეუფე შიოლაშვილი აცხადებს, მას დეკანოზთან კითხვები ჰქონდა.
„კითხვა დავსვი, რატომ ხარ შენ ამ საქმეში მთავარი მოქმედი პირი? წინა პრესკონფერენციაზე აღვნიშნე, რომ გამოძიებამ ბევრი კითხვა დამიტოვა - ჰქონდა თუ არ მას ციანიდი, ვერ დადასტურდა, რომ მან ნამდვილად შეიძინა ის, მაგრამ მე ძალიან მაშფოთებს ის ჩანაწერი, სადაც არის საუბარი დოზაზე, განეიტრალებაზე და ა.შ. ის ისევ რჩება თავის აზრზე, რომ მას ეს მოუწყვეს და ეს მოუწყო ადამიანების იმ ჯგუფმა, ვისაც ასახელებდა და აცხადებს, რომ შორენა თეთრუაშვილისგან ჰქონდა შეკვეთა, რომ ჩამოეტანა და გადაეცა მისთვის“, - განაცხადა მეუფე დიმიტრიმ.
