„დიახაც, მოლაური ზიანის ანაზღაურებას მოვითხოვ, რომ ბევრი აღარ იტლიკინონ! რაც შეეხება თანხას, ის ღირსება, პატივი და საქმიანი რეპუტაცია, რომელიც მაქვს, თანხით შეუფასებელია. სასამართლომ იმსჯელოს, თუ რა თანხას დააკისრებს მეუფე იაკობს. ვიმეორებ, ჩემი პატივი და ღირსება შეუფასებელია“, - განუცხადა „ჯი-ეიჩ-ენ-ს“ მიხეილ რამიშვილმა.
ე.წ. ციანიდის საქმეზე მსჯავრდებულ დეკანოზ გიორგი მამალაძის ადვოკატმა, მიხეილ რამიშვილმა თბილისის საქალაქო სასამართლოში სარჩელი შეიტანა.
„ეს სარჩელი მეუფე იაკობის მხრიდან ჩემი მისამართით საჯარო ცილისწამებას შეეხება. თითქოს, მამალაძის საქმეში ჩანერგილი ვარ და ამავდროულად, თურმე, სანდრო გირგვლიანის საქმეშიც ჩანერგილი პროვოკატორი ვიყავი, ინფორმაცია გამქონდა ახალაიასთან. ეს არის ჩემი პატივის, ღირსების და საქმიანი რეპუტაციის შელახვა. ადამიანს ასეთ რამეში ბრალს რომ სდებ და მტკიცებულებები არ გაქვს, ცილისწამებაა. მას ამ ყველაფრის უარყოფა და იმ მორალური ზიანის ანაზღაურება მოუწევს, რაც მისი განცხადების შემდეგ მომადგა“, - განაცხადა მიხეილ რამიშვილმა.
როგორც ადვოკატი აღნიშნავს, მსგავსი განცხადება ქორეპისკოპოსმა გამიზნულად გააკეთა.
„ამ განცხადებით სურდა იმ ნდობის დისკრედიტაცია მომხდარიყო, რომელიც საზოგადოებას ჩემს მიმართ აქვს. უნდოდა ჩემი იმიჯი, ავტორიტეტი შელახულიყო. მეუფე იაკობს და თავის ჯგუფს ჰგონია, რადგან საუსლიერო პირმა, ქორეპისკოპოსმა თქვა ეს ყველაფერი, საზოგადოება დაიჯერებს. ქორეპისკოპოსობა იმის უფლებას არ აძლევს გამოვიდეს და ადამინს ასე სახალხოდ ცილის დასწამოს. არ ვტრაბახობ, მაგრამ საზოგადოებას ჩემი ნდობა ნამდვილად აქვს, ამიტომ უსახელოს ეს განცხადება მიზანმიმართული იყო. თუმცა, არაფერი გამოუვა მას“, - აცხადებს რამიშვილი.
როგორც ადვოკატი აღნიშნავს, საქმეს თან ერთვის წერილობითი განცხადებები, მათ შორის, გირგვლიანების ოჯახის განცხადება იმის თაობაზე, თუ რა წვლილი აქვს რამიშვილს შეტანილი სტრასბურგში გირგვლიანის საქმის მოგებაში.
