„ეს ბრალი სრული აბსურდია და ანგარიშსწორებაა მის მიერ ციანიდის საქმეზე მიცემული ჩვენების გამო. ახლა ცდილობენ როგორმე მისი ჩვენება გააბათილონ. ირაკლი ამბობს, რომ მას ვერ შეაშინებენ და ყველაფერს გააკეთებს იმისთვის, რომ მისი ნათქვამი ბოლომდე დაადასტუროს“, - განუცხადა „ჯი-ეჩ-ენ-ს“ მსჯავრდებულ ირაკლი ფირცხალავას ადვოკატმა, მალხაზ ველიჯანაშვილმა.
გუშინ, პროკურატურამ ირაკლი ფირცხალავა ჩენების მიცემაზე უარის თქმის გამო სისხლის სამართლის პასუხისგებაში მისცა. ავდოკატი აცხადებს, რომ ფირცხალავას ჩვენებაზე უარი არ უთქვამს და პროკურატურა ცრუობს.
„პროკურატურამ არასწორი ინფორმაცია გაავრცელა. ეს სიმართლე არ არის, როგორ იტყოდა ჩვენებაზე უარს, როცა მან სასამართლოზე მისცა ჩვენება? ფირცხალავას ჩვენების მიცემაზე უარი არ უთქვამს, ამის თაობაზე მოსამართლის განმარტებაც არსებობს. ირაკლი ფირცხალავამ პროკურორების აცილების საკითხი დააყენა, რადგან სწორედ ისინი ესწრებოდნენ იმ დაკითხვას, როცა ფირცხალავამ გონება დაკარგა. მას ეჭვი აქვს, რომ იქ ფიზიკური შეურაცხყოფა მიაყენეს. ამ საქმეზე გამოძიებაც კი არის დაწყებული და დადგენილი არ არის, იქ სცემეს პროკურორებმა, თუ რა მოხდა. შესაბამისად, ამის გამო დააყენა მან პროკურორების აცილების საკითხი და თქვა, რომ ჩვენებას ვერ მისცემდა. შესაბამისად, მაშინ მოსამართლემ პროცესი გადადო“, - აცხადებს ველიჯანაშვილი.
ადვოკატის განცხადებით, ფირცხალავა მზადაა, ჩვენება კვლავ მისცეს.
შეგახსენებთ, რომ 2017 წლის 25 ივნისს, საქართველოს პროკურატურამ დაიწყო გამოძიება მოწმეზე განხორციელებული შესაძლო ზემოქმედების ფაქტზე.
გამოძიების დაწყებას საფუძვლად დაედო ჟურნალისტ ირაკლი მანაგაძის ს განცხადება, რომლის თანახმადაც მასზე, როგორც ბრალდების მხარის მოწმეზე, მსჯავრდებული ირაკლი ფირცხალავას მხრიდან ხორციელდებოდა მიზანმიმართული ფსიქოლოგიური ზემოქმედება, ასევე მისი დისკრედიტაცია და პატივისა და ღირსების შელახვა, რაც მიზნად ისახავდა გიორგი მამალაძის ბრალდების საქმეზე სასამართლოში მის მიერ მიცემული ჩვენების შეცვლას.
