„სასამართლოს მივაწოდეთ ინფორმაცია იმის შესახებ, რომ დაცვის მხარე აპირებს ექსპერტიზა ჩაატაროს იმ აუდიო ჩანაწერთან დაკავშირებით, რომელიც ცოტა ხნის წინ გავრცელდა და უკავშირდება ე.წ პრანკერების მიერ საქართველოს შინაგან საქმეთა მინისტრის, გიორგი მღებრიშვილის ჩაწერას“, - ამის შესახებ ჟურნალისტებს პროცესის შემდეგ ყოფილი პრეზიდენტის, მიხელ სააკაშვილის ადვოკატმა დავით კაკოიშვილმა განუცხადა.
„ჩანაწერში მინისტრი საუბრობს იმის შესახებ , რომ მიხელ სააკაშვილის ექსტრადირება სახელმწიფოს მიზანია არ არის, არ უნდათ, რომ ის ქვეყანაში დაბრუნდეს და.შ მას შემდეგ რაც ექსპერტიზა იქნება ჩატარებული, დასკვნას მტკიცებულების სახით წარმოვადგენთ. ეს მტკიცებულება მნიშვნელოვანი იქნება, რადგან ადასტურებს, რომ მიხეილ სააკაშვილის წინაღმდეგ მიმდინარე საქმეები არის პოლიტიკურად მოტივირებული.
ამ საქმეების მიზანი ის კი არ არის, რომ მიხელ სააკაშვილი მართმსაჯულების წინაშე წარდგეს, არამედ ის, რომ მან საქართველოში ჩამოსვლა ვერ შეძლოს.
ამისთვის ხელისუფლებას და პროკურატურას ესაჭიროება, რომ სასამართლოებში იყოს მიხეილ სააკაშვილის წინააღმდეგ საქმეები.
რაც შეეხება უშუალოდ საქმეს, ეს ხარჯები პრეზიდენტის ბრძანების საფუძველზე იწეოდა. მათ შორის სტუმრების საჩუქრები, ასევე საქველმოქმედო ღონისძიებები. ეს სრულიად კანონიერი იყო და მისი გაწევა გამჭვირვალედ ხდებოდა.
ყველა დოკუმენტი ინახებოდა და ის წარმოდგენილია სასამართლოში.
ამგვარი ხარჯები ნებისმიერ ქვეყანაში გაიწევა, არცერთ ცივილიზებულ ქვეყანაში მსგავს საქმეზე პრეზიდენტის მიმართ ბრალის წარდგენა არ ხდება“, - განაცხადა ადვოკატმა დავით კაკოიშვილმა.
პროკურორ ქეთევან ჩაჩავას განმარტებით კი, დასტურდება, რომ საქართველოს ყოფილი პრეზიდენტი სააკაშვილი და სახელმწიფო დაცვის სპეცსამსახურის ყოფილი უფროსი, თეიმურაზ ჯანაშია ერთობლივად, ჯგუფურად ფლანგავდნენ სახელმწიფოს კუთვნილ თანხებს.
„ამოღებულ იქნა დოკუმენტები, სახელმწიფო დაცვის სპეციალური სამსახურის პატაკები, ანგარიშფაქტურები ანუ ის დოკუმენტები, რომლითაც ხდებოდა უკანონო თანხების ჩამოწერა.
საქმეში არსებობს წერილობითი მტკიცებულებები და ასევე, მოწმეთა ჩვენებები, რომლითაც დასტურდება, რომ საქართველოს ყოფილი პრეზიდენტი მიხეილ სააკაშვილი და დაცვის სპეცსამსახურის ყოფილი უფროსი, თეიმურაზ ჯანაშია ერთობლივად, ჯგუფურად ფლანგავდნენ სახელმწიფოს კუთვნილ თანხებს“,- განაცხადა საქმის პროკურორმა.
