აზერბაიჯანელი ჟურნალისტის აფგან მუხტარლის ადვოკატმა და მისმა მეუღლემ ფარული თვალთვალის ამსახველი ფოტო და ვოდეომასალა გაასაჯაროეს,
ლეილა მუსტაფაევას განცხადებით, 4 მოთვალთვალე პარლამენტის მიმდებარე ტერიტორიაზე მასაც დაჰყვებოდა. ადვოკატი არჩილ ჩოფიკაშვილი ამბობს, რომ მათ 7 აგვისტოს პროკურატურას წარუდგინეს ეს ფოტო და ვიდეომასალა, თუმცა დღემდე ამ პირების იდენტიფიცირება არ მომხდარა. მუხტარლის ადვოკატი არ გამორიცხავს, რომ ლეილა მუსტაფაევასა და დაშგინ აღალარლის წინააღმდეგ ახალი დანაშაული მზადდებოდეს, ქართველი სამართალდამცავების უმოქმედობის გამო კი დაზარალებულებს თავს დაუცველად გრძნობენ.
აფგან მუხტარლი თბილისიდან 29 მაისს გაუჩინარდა. ის აზერბაიჯანში დააკავეს. მას ბაქოს საქალაქო სასამართლომ წინასწარი სამთვიანი პატიმრობა მიუსაჯა, პროკურატურამ ბრალი კონტრაბანდის, სახელმწიფო საზღვრის უკანონო გადაკვეთის და პოლიციისთვის დაუმორჩილებლობის მუხლებით წარუდგინა.
საქართველოში გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს.
