2010-2011 წლების ტერაქტების სეირიის საქმეზე პროკურატურამ ხელახალი გამოძიება დაიწყო. ამ ფარლებში მათ საქმეზე მსჯავრდებული ორი პირი, მერაბ ყოლბაია, იგივე კოჭოია და გოგიტა არქანია დაკითხეს.
„გუშინ მან ის ჩვენება მისცა, რისი მიცემაც ამდენი წლის განმავლობაში უნდოდა. ხელისუფლების შეცვლის შემდეგ, მერაბ ყოლბაიაც და გოგიტა არქანიაც საქმის გამოძიებას ითხოვდნენ. ყოლბაიას გუშინ თითქმის, 4 საათის განმავლობაში კითხავდნენ, მან კონკრეტული პირები დაასახელა, ვინც მას აწამებდა, ვისაც სიკვდილის პირას ჰყავდა მიყვანილი და გაუპატურებით ემუქრებოდა“, - აცხადებს „ჯი-ეიჩ-ენ-თან“ ყოლბაიას ადვოკატი, გელა ნიკოლაიშვილი.
გამოძიების ინტერესებიდან გამომდინარე, ადვოკატი ამ პირების ვინაობის დაკონკრეტებისგან თავს იკავებს, თუმცა, იმ უწყებებს, სადაც ისინი მუშაობდნენ, ასახელებს. როგორც ადვოკატი აცხადებს, ამ ადამიანების ნაწილი უწყებებში დღესაც არიან დასაქმებული.
„კუდ-ის ხელმძღვანელობიდან დაწყებული, პროკურატურის, სასჯელაღსრულების სისტემის ხელმძღვანელობით დასრულებული, ყველა დამნაშავე პირის პაუსხისმგებლობის საკითხი უნდა დადგეს. ამ პირთაგან ნაწილი ამ უწყებებში დღესაც მუშაობენ, ნაწილი ძებნაშია, ნაწილი კი დაპატიმრებული“, - აცხადებს ნიკოლაიშვილი.
რაც შეეხება მსჯავრდებულ ყოლბაიას მოლოდინს, როგორც ადვოკატი აღნიშნავს, ის ამ საქმეს ოპტიმისტურად არ უყურებს.
„ვერ გეტყვით, რომ მაინც და მაინც, ოპტიმისტურადაა განწყობილი, რადგან 7 წელი გავიდა და ამ ადამიანმა სიმართლეს ვერ მიაღწია. თუმცა, მეც ვფიქრობ და მასაც ვუთხარი, რადგან ამჯერად ახალი გამოძიება ოფიციალურად დაიწყო, იმედი უნდა გვქონდეს, რომ ეს საქმე რამდენიმე თვეში თავის ლოგიკურ დასასრულამდე მივა-მეთქი.
მერაბ ყოლბაიამ, სასამართლო პროცესებზე, ჯერ კიდევ 2010-2011 წლებში, ყველაფერი თქვა, რაც მას თავს გადახდა. განაცხადა, რომ აწამებდნენ, არასწორი ჩვენების მიცემას აიძულებდნენ, თუმცა, მოსამართლეებმა ამას ყურადღება არ მიაქციეს. ჩვენების მიცემის საშუალებაც კი არ მისცეს. ის იძულებული იყო, საკუთარი თავისა და სხვების წინააღმდეგ ცრუ ჩვენებები მიეცა“, - აცხადებს ადვოკატი.
შეგახსენებთ, რომ ტერაქტების მოწყობის საქმეზე, წინა ხელისუფლებამ პასუხისგებაში 12 პირი მისცა. აქედან, პატიმრობაში 4 ადამიანი იმყოფება. მათ თავდაპირველად, 30 წლიანი პატიმრობა ჰქონდათ მისჯილი. საბოლოდ, მათ 12-12 წლიანი სასჯელი დაუტოვეს, საიდანაც 7 წელი უკვე მოხდილი აქვთ.
მსჯავრდებულებს 2010-2011 წლებში რუსი გენერლის, ბორისოვის დავალების შესრულებასა და რამდენიმე აფეთქების მოწყობაში დაედოთ ბრალი.
