მორიგ პროვოკაციად აფასებს ე.წ. კორტების საქმეზე მსჯავრდებულ ირაკლი ფირიცხალავას დღევანდელ განცხადებას „ჯი-ეიჩ-ენ-თან“ ვაზაგაშვილების ოჯახის ადვოკატი, გაგი მოსიაშვილი.
„ეს მორიგი პროვოკაციაა... თურმე, გოგატიშვილი კორტების საქმესთან დაკავშრებით, ცრუ მოწმეა და ოქროს მოწმეა, იური ვაზაგაშვილის საქმეზე, მაგრამ ფაქტები სრულიად სხვა რამეს ამობენ. კორტების საქმეზე ეს ადამიანი თვითმხილველია. იური ვაზაგაშვილის მკვლელობის საქმის მასალებს ვიცნობ და გოგატიშვილის სახელი და გვარი აღნიშნულ სისხლის სამართლის საქმეში ირიბადაც კი არ არის ნახსენები. რასაც ვერ ვიტყვით მაგალითად, ე.წ. კორტების სპეცოპერაციის სისხლის სამართლის საქმეზე, სადაც აღნიშნული პირი, სპეცოპერაციის ჩატარების დღესვე ინტერვიუს აძლევს საკუთარი თვალით ნანახი გარემოებების ირგვლივ. ის ადასტურებს იმ გარემოებას, რომ ავტომობილიდან სროლა არ განხორციელებულა, მათი მისამართით კი, იყო“, - განუცხადა „ჯი-ეიჩ-ენ-ს“ მოსიაშვილმა.
ადვოკატის განცხადებით, კობა გოგატიშვილს მისთვის იური ვაზაგაშვილის მკვლელობასთან დაკავშირებით არანაირი ინფორმაცია მიუწიოდებია.
„ის ინფორმაცია, რომელიც დღეს გაავრცელეს, ჩემთვის დღემდე ცნობილი არ იყო. გოგატიშვილი ჩემთან ოფისში ორჯერ იყო მოსული, მაგრამ არცერთ შემთხვევაში, მისი მხრიდან მსგავსი ინფორმაცია არ გაჟეღერებულა. ამიტომ, ვფიქრობ, ეს ოპონენტების მიერ მიზანმიმართული სტრატეგიაა და არასწორი ინფორმაციის გავრცელების მცდელობაა“, - აცხადებს ადვოკატი.
მიუხედავად იმისა, რომ მოსიაშვილს გაჟღერებული ინფორმაციის არ სჯერა, საგამოძიებო ორგანოებს აღნიშნულით დაინტერესებისკენ მოუწოდებს.
„თუკი, ის რაიმე სახის ინფორმაციას მართლა ფლობს, რა თქმა უნდა, საგამოძიებო ორგანო ვალდებულია, ამაზე მოკვლევა დაიწყოს. თუ სახალხო დამცველსაც ამ ფაქტთან დაკავშირებით რაიმე სახის ინფორმაცია აქვს, მასალები შესაბამის საგამოძიებო უწყებას უნდა გადაეგზავნოს. მიუხედავად იმისა, რომ გაცხადებული ინფორმაცია არ მგონია სიმართლეს შეესაბამებოდეს, რომელიც ერთის მხრივ, მძიმე ბრალდებაა, მეორეს მხრივ, შესაძლოა, ინფორმაციის მატარებელი იყოს, აღნიშნულთან დაკავშირებით გამოძიება უნდა დაიწყოს“, - აღნიშნავს მოსიაშვილი.
შეგახსენებთ, რომ დღეს, ირაკლი ფრიცხალავას მეუღლემ, ნინო ხვიტიამ ჟურნალისტებთან ის აუდიოჩანაწერი გაასაჯაროვა, რომელშიც ყოფილი მაღალჩინოსანი კობა გოგატიშვილზე აცხადებს, რომ ის ხელისუფლებისთვის საფრთხეს წარმოადგენს და დიდი ალბათობით, მის ლიკვიდაციას გეგმავენ.
