პროკურატურა გურიის ყოფილი გუბერნატორის გია სალუქვაძისა და თეიმურაზ ჟღენტის მიმართ გამოტანილ გამამტყუნებელ განაჩენებს გადასინჯავს. საგამოძიებო უწყებამ შესაბამისი შუამდგომლობით სააპელაციო სასამართლოს უკვე მიმართა.
უწყების ინფორმაციით, გადაწყვეტილების მიღებამდე აღნიშნულ საქმეებზე ჩატარდა ხელახალი გამოძიება, დაიკითხნენ ახალი მოწმეები, ჩატარდა ათეულობით საგამოძიებო და საპროცესო მოქმედება, შესწავლილ იქნა საგამოძიებო და სასამართლო საქმის მასალები, მოპოვებულ იქნა ახალი მტკიცებულებები და ფაქტები, რის საფუძველზეც გამოძიებამ თითოეულ ამ საქმეში მოიპოვა უტყუარ მტკიცებულებათა ერთობლიობა, რომლითაც გამოირიცხა ხსენებული პირების მიერ იმ დანაშაულის ჩადენის ფაქტი, რისთვისაც ისინი მსჯავრდებულები არიან.
როგორც პროკურატურის მიერ გავრცელებულ განცხადებაშია ნათქვამი, ახალი გამოძიებით დადგინდა, რომ გია სალუქვაძე და თეიმურაზ ჟღენტი გასამართლდნენ და სასჯელს იხდიდნენ წინა ხელისუფლებისთვის მიუღებელი პოლიტიკური შეხედულებების და ხელისუფლების წინააღმდეგ გამართულ საპროტესტო აქციებში მონაწილეობის გამო.
გია სალუქვაძემ და თეიმურაზ ჟღენტმა საპატიმრო დაწესებულება, ხელისუფლების ცვლილების შემდეგ, 2013 წლის იანვარში დატოვეს, როდესაც საქართველოს პარლამენტმა მათ პოლიტპატიმრის სტატუსი მიანიჭა.
პროკურატურის ინფორმაციით, ახლადგამოვლენილ გარემოებათა გამო განაჩენის გადასინჯვის შუამდგომლობით პროკურატურამ სააპელაციო სასამართლოს 29 მსჯავრდებულის საქმეზე მიმართა, საიდანაც 11 პირის მიმართ უკვე დადგა გამამართლებელი განაჩენი.
