”თეთრი ხმაურის მოძრაობის” წევრს, ბექა წიქარიშვილს დღეს თბილის სასაქალაქო სასამართლოში გამამტყუნებელი განაჩენი გამოუტანეს. მას ჯარიმის სახით 2 000 ლარის გადახდა დაეკისრა.
მოსამართლის გადაწყვეტილებით, წიქარიშვილს წარდგენილი ბრალი მარიხუანის პირადი მოხმარებისთვის შეძენა-შენახვაში გადაუკვალიფიცირდა, რაც ჯარიმას ან საზოგადოებისთვის სასარგებლო შრომას ითვალისწინებს.
”მოსამართლემ მოქმედი კანონმდებლობის პირობებში მინიმალური სასჯელი გამოიტანა. თუმცა, შეეძლო გამამტყუნებელი განაჩენი სასჯელის გარეშე გამოეტანა. შესაძლოა, ამ ნაწილში სააპელაციო სასმართლოში ვიდაოთ”, - განუცხადა ”ჯი-ეიჩ-ენ-ს” ბექა წიქარიშვილმა.
შეგახსენებთ, რომ ბექა წიქარიშვილი ნარკოდანაშაულის ბრალდებით 2013 წელს დააკავეს. ის 10 ათას ლარიანი გირაოთი გაათავისუფლეს. ამის შემდეგ, მან საკონსტიტუციო სასამართლოს მიმართა გაუქმებულიყო ის სანქცია, რომელიც 70 გრამამდე მშრალი მარიხუანის მოხმარებაზე 7-დან 14-წლამდე თავისუფლების აღკვეთას ეხებოდა. საკონსტიტუციო სასამართლომ 2015 წელს ეს ნორმა გააუქმა. ერთი თვის წინ კი, კანონში შეტანილი ცვლილებებით, ამ მუხლის დარღვევისთვის სანქციად ჯარიმა განისაზღვრა.
