ბორჯომში მცხოვრები პაატა ჯავახიძე ახალციხის პროკურატურაში რამდენიმე საათის განმავლობაში სამართალდამცავებს ჩვენებას აძლევდა. საგამოძიებო უწყებაში ის საკუთარი ინიციატივით გამოცხადდა, ამის შესახებ „ჯი-ეიჩ-ენ-ს“ ჯავახიძის ადვოკატმა, ტარიელ კაკაბაძემ განუცხადა.
პაატა ჯავახიძის მტკიცებით, ის ბორჯომის გამგებლის, დიმიტრი ყიფიანის სატელეფონო საუბარს შეესწრო, რომლის თანახმადაც, „მეტი ცეცლხის გაჩენა არ უნდოდათ“.
„მან პირადად მოისმინა, თუ როგორ ესაუბრებოდა ტელეფონით მის ახლობელს ბორჯომის გამგებელი, რომ მეტი ცეცხლის გაჩენა არ უნდოდათ და ისიც საკმაირისი იყო, რაც უკვე გააჩინეს, გაექცათ, ზედმეტი მოუვიდათ. მან სხვა საუბრებიც მოისმინა, თუმცა, დეტალურად ამ ყველაფერს ვერ გეტყვით. მან ამ ყველაფერზე ჩვენებაში დეტალურად ისაუბრა. ფაქტი ერთია, აქედან ვლიდნება, რომ ცეცხლი შეგნებულადაა გაჩენილი.თუ საგამოძიებო ორგანოები ეფექტურად იმუავებენ, მათ შეუძლიათ გარკვეულ მტკიცებულებათა ერთობლიობა მოიპოვონ“, - განაცხადა „ჯი-ეიჩ-ენ-თან“ ადვოკატმა.
ის აღნიშნავს, რომ მისი დაცვის ქვეშ მყოფი საგამოძიებო ორგანოში საკუთარი სურვილით გამოცხადდა. თუმცა, მანამდე ადვოკატს დაუკავშირდა.
„ მიუხედავად იმისა, რომ ძალიან შეშინებული იყო, როცა დამირეკა, მას თავადვე ჰქონდა გადაწყვეტილი, სიმართლე ეთქვა. ეს ინფრომაცია ჩემთვისაც შოკისმომგვრელი იყო“, - აღნიშნავს კაკაბაძე. ის დასძენს, რომ ჯავახიძემ ეს საუბარი დაახლოებით, იმ პერიოდში მოისმინა, როცა ხანძარმა პიკს მიაღწია.
