„თეთრი ხმაურის მოძრაობის“ წევრები ძალოვან უწყებებს და უსაფრთოხების სამსახურის წარმომადგენლებს ღიად ადანაშაულებენ ნარკოტიკული საშულებების მიმოქცევაში.
„ნარკოპოლიტიკასთან დაკავშირებით მთავარი აქტორები ძალოვანი უწყებები არიან, რომლებიც მოთხოვნა-მიწოდებიდან დაწყებული, შემოტანა, გასაღებით დამთავრებული, ყველაფერს აკონტროლებენ. შინაგან საქმეთა სამინისტროს გარეშე ამ ქვეყანაში ნარკოტიკული საშუალების შემოტანა და გასაღება არ ხდება.
საფუძვლიანი ეჭვი გვაქვს და დარწმუნებულიც კი ვართ იმაში, რომ სახიფათო ნარკოტიკის გაჩენა ძალოვანი უწყებების გარეშე ვერ მოხდებოდა. ეს ერთადერთ მიზანს ემსახურება, საშემოდგომო სესიაზე ნარკოპოლიტიკის შესახებ მომზადებული კანონპროექტი გარკვეულმა ჯგუფებმა, კონკრეტულად კი, ძალოვანმა უწყებებმა ჩააგდონ“, - აცხადებს „ჯი-ეიჩ-ენ-თან“ საუბარში „თეთრი ხმაურის მოძრაობის“ წევრი, იურისტი გიორგი მახარაძე.
მახარაძე აღნიშნავს, რომ ქვეყანაში ნარკოტიკული საშუალებების მოპოვება საკმაოდ მარტივად ხდება.
„ნარკოტიკული საშუალების შეძენა არა მხოლოდ კლუბებშია შესაძლებელი, არამედ ნებისმიერ ადგილზე. გავრცელებული ინფორმაციის თანახმად, საშიში ნარკოტიკული საშუალება GHB-ია. ეს ნივთირება საქართველოში არ მზადდება, ის სხვა ქვეყნებიდანაა შემოტანილი. ეს ერთ-ერთი ყველაზე სახიფათო, ზედოზირების მაღალი რისკის შემცველი ნივთიერებაა.
რაც შეეხება გარდაცვლილ გოგონას, აუცილებლად უნდა გაირკვეს კონკრეტულად რა ნივთიერების გამო გარდაიცვალა ის, საიდან და ვინ შემოიტანა, ვინ გაასაღა და ა.შ. მთავარი კითხვები ესაა. ელექტრონული მუსიკის ფესტივალზე ვიღაც ნარკოტიკულ საშუალებას რომ მოიხმარს, ეს ძალოვანმა უწყებება იციან. ამასთან დაკავშირებით, სამედიცინო პერსონალიც გადამზადებული უნდა ჰყავდეთ. სახელმწიფო კი რეპრესიის გარდა არაფერს აკეთებს. ხალხი ზედოზირებით კვდებოდა აქამდეც და სამწუხაროდ, მომავალშიც გარდაიცვლება. ზიანის შემცირების პროგრამები, ცნობიერების ამაღლება გვჭირდება.
ნარკოტიკული საშუალებების ყიდვა-გაყიდვა ყველაზე დიდი ბიზნესია. ამას გარდა, მკაცრი ნარკოპოლიტიკის შემთხვევაში, შსს ქულებს იწერს, დანაშაული გავხსენითო“, - აცხადებს მახარაძე.
როგორც ის აღნიშნავს, ორგანიზაცია აქტიურად მუშაობს რისკების შემცირებაზე.
„სამომავლო გეგმებზე ახლა ვერაფერს გეტყვით, რადგან შემდეგი ნაბიჯები დამუშავების პროცესშია. ვფიქრობთ, უფრო მეტი ყურადღება დავუთმოთ ზიანის შემცირების პროგრამებს და პრევენციულ ღონისძიებებს“, - განაცხადა იურისტმა.
