ნარკოდანაშაულის ბრალდებით დაკავებული „თეთრი ხმაურის მოძრაობის“ აქტივისტის, 22 წლის ბაქარ კორშიას ადვოკატი, ნანა დარჩია „ჯი-ეიჩ-ენ-თან“ საუბარში კატეგორიულად გამორიცხავს, რომ კორშია ნარკორეალიზატორი იყო.
„კორშიამ ეს ნივთიერება პირადი მოხმარებისთვის შეიძინა. ეს ადამიანი შეცდომაში შეიყვანეს, მას უთხრეს, რომ ეს კლუბური, მსუბუქი გამაბრუებელი, ფსიქოტროპული საშუალება იყო. კორშიამ არც კი იცოდა, ეს ნივთიერება ნარკოტიკი თუ იყო. ეს რომ მცოდნოდა, ნარკოტიკი იყო, ახლოსაც არ გავეკარებოდიო, ამბობს. მუხლის სიმძიმე ნივთიერების რაოდენობიდან გამომდინარეა. აღნიშნული ბრალი 8-დან 20 წლამდე, ან უვადო პატიმრობას ითვალისწინებს. აქედან გამომდინარე, წინასწარ პროგნოზის გაკეთება, თუ რამდენი შეიძლება მას მიუსაჯონ, რთული იქნება“,- აცხადებს დარჩია.
ადვოკატი აღნიშნავს, რომ დაკავებისას მისი დაცვის ქვეშ მყოფს მხოლოდ მარიხუანას მომხარება დაუდგინდა. რაც შეეხება იმას, თუ სად და როგორ შეიძინა მან ნარკოტიკული საშუალება, როგორც დარჩია აცხადებს, მას ეს ჯერ არ დაუდგენია.
„ ამ დღეებში პროკურატურასთან საპროცესო გარიგებისთვის მოლაპარაკება უნდა დავიწყოთ. პროკურორმა აღკვეთის ღონისძიების შეფარდებისას განგვიცხადა, რომ საპროცესო შეთანხმება შესაძლებელი იყო, თუმცა, ეს იმას არ ნიშნავს, რომ მას გარეთ გამოუშვებენ. ბაქარ კორშია სადაც „ჯემ ფესტი“ ტარდება, ბარ-მენეჯერად მუშაობდა“, - აცხადებს ადვოკატი.
შეგახსენებთ, რომ ბაქარ ყორშია სამართალდამცავებმა ნარკოტიკული საშუალების შეძენა-შენახვის ფაქტზე დააკავეს. მას ზუგდიდის რაიონულმა სასამართლომ 2 თვიანი წინასწარი პატიმრობა შეუფარდა. ის მარიხუანის მოხმარებისთვის 500 ლარითაც დაჯარიმდა.
მომდევნო სასამართლო პროცესი 5 სექტემბერსაა ჩანიშნული.
