ხვალ, 11 საათზე თბილისის საქალაქო სასამართლოში ე.წ. ციანიდის საქმის განხილვა განახლდება. როგორც ”ჯი-ეიჩ-ენ-ს” დეკანოზ გიორგი მამალაძის ადვოკატმა, გიორგი ფანცულაიამ განუცხადა, სასამართლოს ჩვენებას დეკანოზი მისცემს.
”დიდი ალბათობით, ბრალდებული დეკანოზ გიორგი მამალაძე დაიკითხება. ასევე, დაცვის მხარის მტკიცებულებების გამოკვლევაც მოხდება, რომელიც გამოძიების პერიოდში დაცვის მხარის მიერ იქნა მოპოვებული. რამდენიმე სახის მტკიცებულებაზეა საუბარი. ჩვენ ყველა სამართლებრივი ღონისძიება გამოვიყენეთ, რომ აეროპორტში არსებული ვიდეოკამერებიდან ჩანაწერი ამოგვეღო, რომელზეც როგორც დეკანოზის დაკავება, ასევე მისი ბარგის გახსნა-არ გახსნის ფაქტი იქნებოდა დაფიქსირებული. ამ ყველაფრის მოპოვებას რომ ვცდილობდით, პროკურატურა კი ამის საპირისპიროდ რას აკეთებდა, ამის დამადასტურებელ დოკუმენტაციას სასამართლოზე წარვადგენთ”,- განუცხადა ”ჯი-ეიჩ-ენ-ს” ფანცუალაიამ.
