თბილისის საქალაქო სასამართლოში ე.წ. ციანიდის საქმეზე დაცვის მხარის ერთ-ერთი მთავარი მოწმის, ირაკლი ფირცხალავას დაკითხვა დასრულდა.
პროცესის დასრულების შემდეგ ჟურნალისტებთან კომენტარი საქმის ერთ-ერთმა პროკურორმა ზვიად გუბელაძემ გააკეთა.
პროკურორმა ირაკლი ფირცხალავას "არასანდო" მოწმე უწოდა.
"დადგინდა, რომ ირაკლი ფირცხალავას მიერ გაკეთებული საჯარო განცხადებები, ასევე სასამართლო პროცესზე მიცემული ჩვენებები არის სიცრუე და რეალობას არ შეესაბამება. ირაკლი ფირცხალავა გადმოცემით საუბრობდა, ის კონკრეტული ფაქტების შემსწრე არ ყოფილა, ის მხოლოდ მე-3 პირისგან მიღებული ინფორმაციებით საუბრობდა. ოფიციალურ ინფორმაციაზე დაყრდნობით შეგვიძლია განვაცხადოთ, რომ ირაკლი ფირცხალავას მიერ გაკეთებული საჯარო განცხადებები სიმართლეს არ შეესაბამება", - აღნიშნა გუბელაძემ.
რაც შეეხება იმას, ნამდვილად მონაწილეობდა ირაკლი მამალაძე მომღერალ თემურ თათარაშვილის და ჟურნალისტ გიო გაბუნიას დაკავების პროცესში, როგორც პროკურორი გუბელაძე ამბობს, თუ ეს სიმართლეს შეესაბამება, ამის დამადასტურებელი დოკუმენტები დაცვის მხარეს შეუძლია წარმოადგინოს.
"ირაკლი ფირცხალავას ნათქვამი, მე როგორც ვიცი და გადმოცემით ვიცი, რომ ეს ასეა, მტკიცებულება არ არის.
მინდა შეგახსენოთ რომ ძალოვანი უწყების ყოფილი მაღალჩინოსანი თბილისის საქალაქო სასამართლოს მიერ უკვე ორგზის გასამართლებულია განზრახ მკვლელობის ორგანიზების ფაქტზე, - განაცხადა მან.
დღეისთვის ე.წ. ციანიდის საქმის განხილვა დასრულდა. ის პარასკევს 11:00 საათზე განახლდება.
