ამ წუთებში, თბილისის საქალაქო სასამართლოში კრიმინალური პოლიციის ირაკლი ფირცხალავას ბადრაგირება მოხდა. მისი დაკითხვა სასამართლოში, რამდენიმე წუთში დაიწყება.
პროცესის დაწყებამდე "ჯი-ეიჩ-ენთან" დეკანოზ გიორგი მამალაძის ადვოკატმა პაატა მეხრიშვილმა კომენტარი გააკეთა.
მისი თქმით, პროკურორმა სახელმწიფო საიდუმლოების შემცველი ინფორმაცია გაასაჯაროვა, რის გამოც, მისი პასუხისმგებლობის საკითხი უნდა დადგეს.
"პროკურატურამ მოიტანა რაღაც განცხადება, რომელზეც თქვეს, რომ ეს არის სახელმწიფო საიდუმლოების შემცველი ინფორმაციის მქონე განცხადება. შესაბამისად, მოსამართლემ ყველა გაგვაფრთხილა რომ ამ განცხადების შინაარსი არ გახმაურებულიყო და საჯარო არ გამხდარიყო, როგორც სახელმწიფო საიდუმლოების შემცველი ინფორმაცია. წინააღმდეგ შემთხვევაში, სისხლის სამართლებრივი პასუხისმგებლობა დაგვეკისრება. როგორც აღმოჩნდა, ამ განცხადებით სასამართლოში გამოკვლვევისთანავე, პროკურორი გარეთ გამოვარდა და ჟურნალისტებს დეტალური ინფორმაცია მიაწოდა, რა შინაარსის შემცველი იყო ეს განცხადება. არადა რეალურად ეს განცხადება არაფრისმომცემი იყო. ამას საიდუმლო ინფორმაციის შემცველი დოკუმენტი დაარქვეს. არადა ეს ვალდებულება პირველ რიგში პროკურორს ჰქონდა. თუ ეს საიდუმლო ინფორმაციის შემცველი დოკუმენტი იყო, არ უნდა გასაჯაროვებულიყო. ამით დაირღვა კანონი. მათ დაარღვიეს კანონი და ეს შეიცავს დანაშაულის ნიშნებს, რის საფუძველზეც გამოძიება უნდა დაიწყოს. ინტერნეტის საშუალებით გავეცანი პროკურორის მიერ გაკეთებულ განცხადებას, სადაც ის ამბობს, რომ ირაკლი მამალაძის აგენტობის არც ოფიციალური და არც არაოფიციალური დამადასტურებელი ინფორმაცია არსად აღმოჩნდა. ეს არის ტყუილი. ეს ასე არ არის, დანარჩენს ვერაფერს გეტყვით, რადგან საიდუმლოების შემცველი ინფორმაცია დაარქვეს", - განაცხადა პაატა მეხრიშვილმა. ადვოკატი არ აკონკრეტებს რომელ ინფორმაციას შეეხებოდა აღნიშნული საკითხი.
რაც შეეხება საქმის პროკურორ ზვიად გუბელაძეს, ,,ჯი-ეიჩ-ენთან“ აცხადებს, რომ მას არავითარი სახელმწიფო საიდუმლოების შემცვლელი ინფორმაცია არ გაუთქვამს.
