ამ წუთებში თბილისის საქალაქო სასამართლოში ე.წ. ციანიდის საქმის განხილვა მიმდინარეობს. პროცესზე ბრალდების მხარის აუდიო-ვიდეო მტკიცებულებების განხილვა მიმდინარეობს.
როგორც გიორგი ფანცულაიამ აღნიშნა, ჩანაწერებში ირაკლი მამალაძე გიორგი მამალაძეს ეკითხება, თუ რისთვის სჭირდება მას ციანიდი. მისივე თქმით, დეკანოზი ხაზგასმით ამბობს, რომ ეს ნივთიერება მას არავის მიმართ გამოსაყენებლად არ სჭირდება.
,,იმ ჩანაწერების გამოკვლევა მიმდინარეობს, რომლის ჩაწერაც ირაკლი მამალაძემ როგორც სასამართლოს განჩინებით, ასევე მის გარეშეც განახორციელა. ჩვენ ამის დაუშვებლობას ვითხოვდით, თუმცა მოსამართლემ მაინც დასაშვებად ცნო. ამ ჩანაწერებში დიალოგს ციანიდთან დაკავშირებით ირაკლი მამალაძე იწყებს. ირაკლი მამალაძე გიორგი მამალაძეს ეკითხება, თუ რისთვის სჭირდება მას ციანიდი. დეკანოზი ხაზგასმით ამბობს, რომ ეს ნივთიერება მას არავის მიმართ გამოსაყენებლად არ სჭირდება. მოსამართლეც რწმუნდება იმაში, რომ გიორგი მამალაძეს ეს ნივთიერება არავისთვის სჭირდებოდა. ირაკლი მამალაძე შეგზავნილი მოწმეა, აგენტპროვოკატორია. ის ყველა შეხვედრაზე, ეს იქნება რესტორანი თუ სხვა ადგილი, ცდილობს დეკანოზს ამ თემაზე დაუწყოს საუბარი. დეკანოზის პასუხებიდან ჩანს, რომ ის ამ ნივთიერების გამოყენებას, არავის მიმართ არ აპირებდა'', - აღნიშნა ,,ჯი-ეიჩ-ენთან'' საუბრისას ადვოკატმა გიორგი ფანცულაიამ.
რაც შეეხება იმას, თუ რაში სჭირდებოდა დეკანოზ მამალაძეს ციანიდი, როგორც ადვოკატი აცხადებს, ამაზე პასუხი თავად დეკანოზს აქვს.
,,სიტყვასიტყვით ვიმეორებ დეკანოზის პასუხს: ,,სხვა დანიშნულებით მჭირდება საპატრიარქოსთვის'', - აღნიშნა ადვოკატმა.
რაც შეეხება დაცვის მხარის ერთ-ერთ მთავარ მოწმეს, კრიმინალური პოლიციის დეპარტამენტის უფროსის ყოფილი მოადგილის ირაკლი ფირცხალავას დაკითხვას, ის სავაურაუდოდ 3 საათზე დაიკითხება.
