გაუჩინარებული კარიკატურისტის, ბესიკ დუღაშვილის დამ, ანნა დუღაშვილმა დღეს ”ჯი-ეიჩ-ენ-ს” ექსკლუზიური ინფორმაცია მიაწოდა მისი ძმის გამოჩენის შესახებ. თუმცა, როგორც მოგვიანებით გაირკვა, ეს სიმართლე არ აღმოჩნდა.
”ეს ძალიან მწარე ხუმრობაა, რომელმაც ცხოვრება გამინადგურა. დღეს ამ ამბის გამო მთელი დღე ისეთი ბედნიერი ვიყავი, კინაღამ პოლიციის განყოფილებაში ვიცეკვე. ჟურნალისტებს დავუდასტურე, ჩემი ძმა გამოჩნდა-მეთქი და როგორი სირცხვილია, რომ ეს ცრუ ინფორმაცია აღმოჩნდა და ჩემივე სიტყვებს უარვყოფ!”, - განუცხადა ”ჯი-ეიჩ-ენ-ს” ანნა დუღაშვილმა.
მისი თქმით, ის შეცდომაში სხვებმა შეიყვანეს.
”პირველი წყარო, ვისგანაც ეს ინფრომაცია წამოვიდა, ის სასტიკად უარყოფს, მე არ მითქვამსო. ბესოს ყოფილი ცოლის ძმამ ჯერ პოლიციაში დარეკა, შემდეგ კი მე დამირეკა, დედა ივლიტამ დამირეკა, ბესოს მისთვის დაურეკავს მონასტერში ვარო. დედა ივლიტა კი ამბობს, მე ასე კი არ მითქვამს, ვთქვი, რომ ვიცოდი მონასტერში წასვლას აპირებდაო.. კიდევ კარგი, სამართალდამცავებს ერთი წუთითაც არ შეუწყვიტავთ სამძებრო სამუშაოები. მათ არც ჩემი დაკითხვა შეუწყვიტავთ, მე კიდევ სულელურად გავიხარე და ეს ამბავი ქვეყანას მოვდე.
თურმე, უნდა გადამემოწმებინა და სიმართლე თუ აღმოჩნდებოდა, მერე გამევრცელებინა, მაგრამ იმ მომენტში სიხარულმა აზროვნება გადამიკეტა. ეს ამბავი ძალიან გამიხარდა და ამდენი ადამიანი შეცდომაში შევიყვანე. თუ ეს სპეციალურად გავრცელებული ინფორმაციაა, მაშინ ეს ბოროტი ქმედებაა, თუ ”გაფუჭებული ტელეფონის” ვარიანტია, ეს კიდევ სხვა საკითხია”, - აცხადებს ანნა დუღაშვილი.
სამართალდამცავები კარიკატურისტის ძებნას კვლავ განაგრძობენ. როგორც ცნობილია, სამძებრო სამუშაოები ძამას ხეობაში მიმდინარეობს.
შეგახსენებთ, რომ ცნობილ კარიკატურისტს, ბესიკ დუღაშვილს სამართალდამცავები და ოჯახის წევრები 2 დღეა ეძებენ. გაუჩინარებამდე მან სოციალურ ქსელში გამოსამშვიდობებელი პოსტი დაწერა.
