თუ გამოძიებამ საქმეში არ გამოკვეთა მოტივი, ზოგადად ამ საქმის გამოძიებას აზრი არ აქვს, თუ მოტივი არ არსებობს, ჩვენ მივდივართ იქამდე, რომ ჩემთვის უცნობმა დარჩო ხეჩუაშვილმა ერთ მშვენიერ დღეს გაიღვიძა და ისე შევჯავრდი, რომ გადაწყვიტა, რადაც არ უნდა დაჯდომოდა, უნდა მოვეკალი, - ამის შესახებ ”ევროპული საქართველოს” ერთ-ერთმა ლიდერმა გივი თარგამაძემ ჟურნალისტებს სასამართლო პროცესიდან გამოსვლის შემდეგ განუცხადა.
მისი თქმით, მან და მისმა მძღოლმა დავით ვარდოსანიძემ ავტომანქანის აფეთქების დღე 2016 წლის 4 ოქტომბერი პროცესზე დეტალურად გაიხსენეს. თარგამაძის თქმით, ერთადერთი ლოგიკური კითხვა სასამართლო პროცესზე ძებნილი დავით (დარჩო) ხეჩუაშვილის ადვოკატს ჰქონდა. კერძოდ, თარგამაძის განცხადებით, ხეჩუაშვილის ადვოკატმა მას ჰკითხა, თუ თარგამაძეს არანაირი კონტაქტი არ ჰქონდა და ნაცნობობა ხეჩუაშვილთან, რატომ გადაწყვიტა მან თარგამაძის მოკვლა.
მისივე თქმით, მას რაც გააჩნდა ინფორმაცია, გამოძიებას მიაწოდა. თარგამაძემ აღნიშნა, რომ მას არა აქვს მოლოდინი, რომ ეს საქმე იქნება გამოძიებული. მისივე თქმით, ამ საქმის პირველ ნაწილში, სადაც ბრალდებული ბორის ჩაგუნავა იყო, ის იარაღის უკანონო შეძენა-შენახვისათვის გაასამართლეს და დარბაზიდან 6-წლიანი გამოსაცდელი ვადით გაათავისუფლეს.
”ბორის ჩაგუნავა, რომელიც მანამდე მუხროვანზე და შევარდნაძის პირველ ტერაქტზე იყო ბრალდებული, ეს ადამიანი ამ საქმიდან ისე გამოყვეს, რომ უკან ვერ მიუბრუნდები. ერთი და იგივე საქმეზე ორჯერ გასამართლება არ შეიძლება. ამიტომ, მე ვვარაუდობ, რომ აფეთქებაში მეორე ბრალდებულს (დარჩო ხეჩუაშვილი) და მასთან დაკავშირებულ პირებსაც მეორე ცხრათვიანი გამოძიების შემდეგ ასევე გამოყოფენ ცალკე საქმერდ, რაც საბოლოო ჯამში გამოვა, რომ ყველა ფიგურანტი ამ პროცესს ცალ-ცალკე გაივლის და საქმეში ერთიანი სურათი არ დაიხატება ამ გამოძიებებისა და სასამართლო პროცესების შედეგად”, - განაცხადა თარგამაძემ.
