"ადვოკატის გამოსაძრომიდან თუ შევხედავთ, მტკიცებულებები საქმეში არ არის, მხოლოდ ფოტოსურათით ვერ მოხდება იმის დაფიქსირება, ეს ცეცხლსასროლი იარაღი იყო თუ არ იყო”, - ამის შესახებ "ევროპული საქართველოს“ წევრმა ოთარ კახიძემ განაცხადა.
დეპუტატის თქმით, მიუხედავად იმისა, რომ საქმეში საკმარისი მტკიცებულებები არ არის, ის გამოკითხვაზე მისვლას მაინც აპირებს და მზადაა გამომძიებლების შეკითხვებს გულწრფელად უპასუხოს.
მისივე მტკიცებით, მზადაა სასჯელისთვის, რაც, მისივე განმარტებით, შესაძლოა, იყოს გაფრთხილება, ან ჯარიმა 500 ლარის ოდენობით.
"ეს მთლიანად ჩემზეა დამოკიდებული, ჩემს მიერ ინფორმაციის დადასტურებაზე, ან არდადასტურებაზე. მაგალითად, მე რომ ვთქვა, სათამაშო იარაღი იყო, ეს უკვე კანონდარღვევა აღარ იქნება, მაგრამ მე, როგორც პოლიტიკოსმა, არ მინდა, ტყუილი ვთქვა, ამიტომ ამას ვადასტურებ, რომ ეს იყო ცეცხლსასროლი იარაღი და ამავე დროს ვადასტურებ იმასაც, რომ ჩემი მოქმედება არ შეესაბამებოდა „შეკრებისა და მანიფესტაციების კანონს“,- განუცხადა ოთარ კახიძემ საზოგადოებრივს.
შეგახსენებთ, რომ ოთარ კახიძე გამოკითხვაზეა დაბარებული.
კახიძე ძველი თბილისის პოლიციის სამმართველოში 15:00 საათზე უნდა გამოცხადდეს.
საქმე ეხება „ევროპული საქართველოს“ ორგანიზებულ აქციაზე კახიძის მიერ იარაღით მისვლის საკითხს.
შსს-ს თბილისის პოლიციის დეპარტამენტის ძველი თბილისის სამმართველომ ადმინისტრაციული სამართალწარმოება დაიწყო ადმინისტრაციულ სამართალდარღვევათა კოდექსის 174 პრიმა მუხლისა და 239 მუხლის მე-13 ნაწილის საფუძველზე.
შსს-ს პრესსამსახურში აცხადებენ, რომ დეპუტატის გამოკითხვის შემდეგ, შედგება ოქმი, რომელიც სასამართლოში გადაიგზავნება.
საქმეზე საბოლოო გადაწყვეტილებას სასამართლო მიიღებს.
