Qatar Airways-ის ტრანზიტული მგზავრები, რომელთაც გადაჯდომა დოჰაში უწევთ, ქალაქის სასტუმროში გაჩერებას უფასოდ შეძლებენ. აქცია სამი თვის განმავლობაში გაგრძელდება.
აქციისთვის ავიაგადამზიდავმა სამი ვარიანტი შეიმუშავა: — +Qatar Premium — 4* სასტუმროში ერთჯერადი ღამისთევა, მათთვის ვინც ეკონომ კლასით მგზავრობს; — +Qatar Luxury — 5* სასტუმროში ერთჯერადი ღამისთევა, მათთვის ვინც ბიზნეს და პირველი კლასით მგზავრობს; — +Qatar Ultimate — 4* ან 5* სასტუმროში ორჯერადი ღამისთევა პლუს $50.
არჩევანისათვის ავიაკომპანია მგზავრებს ოთხს სასტუმროს სთავაზობს: The Four Seasons, Marriott Marquis, Radisson Blu და Oryx Rotana.
აღსანიშნავია, რომ 2016 წლის სექტემბერში ყატარმა Qatar Airways-ის ინიციატივით ტრანზიტული მგზავრებისათვის სავიზო რეჟიმი გაამარტივა. თუკი მგზავრს დოჰას საერთაშორისო აეროპორტში უწევს გადაჯდომა და ამისათვის დრო 5 საათზე მეტია, მაშინ დოჰას აეროპორტშივე შესაძლებელია 96 საათიანი ვიზის უფასოდ გაფორმება.
„გასულ წელთან შედარებით, მგზავრების რაოდენობა, რომლებიც დოჰაში ტრანზიტს ირჩევე, 53%-ით გაიზარდა. ჩვენ იმედი გვაქვს, რომ პროგრამა +Qatar უფრო მეტი ტურისტის მოზიდვაში დაგვეხმარება“, განაცხადა Qatar Tourism Authority-ს ტურიზმის განვითარების დირექტორმა ჰასან ალ-იბრაგიმმა.
