საქართველოს კომუნიკაციების ეროვნული კომისიის აპარატის აუდიო-ვიზუალური მომსახურებების რეგულირების დეპარტამენტმა მიმდინარე წლის თებერვალსა და მარტში რიგი მაუწყებლების ბადეში განთავსებული პროგრამების სპონსორობის და პროდუქტის (საქონლის/მომსახურების) განთავსების წესების დაცვის მონიტორინგი ჩაატარა.
მონიტორინგის შედეგად პროგრამების სპონსორობის და პროდუქტის (საქონლის/მომსახურების) განთავსების წესების დარღვევის შემთხვევები ხუთ ტელეკომპანიას დაუფიქსირდა, შპს „სტუდია მაესტრო“ და შპს „ტელეკომპანია პირველი“ კომისიამ 2017 წლის 23 მარტს წერილობით გააფრთხილა. 30 მარტს გამართულ სხდომაზე კომისიამ შპს „იბერია TV“-ს და შპს „ტელეიმედის“ საკითხები განიხილა და ორივე ტელეკომპანია პროგრამების სპონსორობის და პროდუქტის (საქონლის/მომსახურების) განთავსების წესების დარღვევის გამო წერილობით გააფრთხილა. შპს „სამაუწყებლო კომპანია რუსთავი -2“-ის საკითხის განხილვა, ტელეკომპანიის მოთხოვნის საფუძველზე, მიმდინარე წლის 4 აპრილს 15:00 საათზე გადაიდო.
კომისიამ მიიჩნია, რომ „მაუწყებლობის შესახებ“ და „რეკლამის შესახებ“ საქართველოს კანონები დაირღვა, რადგან, პროგრამაში პროდუქტის (საქონლის/მომსახურების) განთავსებისას, აკრძალულია პროდუქტის შეძენისაკენ პირდაპირი მოწოდება და პროდუქტისათვის გადაჭარბებული მნიშვნელობის მინიჭება, ასევე სასპონსორო ტიხრებში საქონლის/მომსახურების შეძენის, მიწოდებისა და მოხმარებისაკენ პირდაპირ მოწოდებას ჰქონდა ადგილი, რაც სპონსორზე მითითების, კომერციული რეკლამისა და პროდუქტის განთავსების წესების დარღვევაა.
