დღეს „განსხვავებული აქცენტების“ ეთერში „ქრონიკა+“-ის რედაქტორ, ელისო კილაძესთან ფარული ჩანაწერების მიტანის გამო ბრალდებული გელა ღურწკაია იყო მიწვეული. მისი თქმით, ფარული ჩანაწერები მისცა ადვოკატმა ნიკოლოზ ხაჭაპურიძემ და მას არ დაუსვამს კითხვები ფირის წარმომავლობასთან დაკავშირებით. ხოლო ელისო კილაძესთან მიტანის მოტივი იმით ახსნა, რომ მისთვის მიუღებელია პოლიტიკაში ისეთი ადამიანების ხილვა, რომელთა პირადი ცხოვრება არაა მისთვის მისაღები. მან საქმეში საკუთარი ფინანსური დაინტერესება გამორიცხა.
ეთერის მსვლელობისას ტელეფონით ჩაერთო ჟურნალისტი ელისო კილაძე. მან კიდევ ერთხელ ისაუბრა საქმის შესახებ და გელა ღურწკაიას პროვოკაციაში დასდო ბრალი.
„მინდა სისხლის სამართლის მასალებზე გითხრათ კონკრეტულად. გელა ღურწკაია იტყუება ახლა იმაში, რასაც ამბობს. მის პირველ ჩვენებაში მას ეს კადრები მისცა ვინმე ვაჟა სისილოშვილმა, რომელიც არის ასევე კუდის სპეცდანიშნულების რაზმის ყოფილი წევრი და რომელიც ცხოვრობს წეროვანში. ამის შემდეგ ის ცვლის ჩვენებას და ამბობს, რომ ეს კადრები მისცა ნიკოლოზ ხაჭაპურიძემ.
რაც შეეხება მოტივს, ხაჭაპურიძემ მოიყვანა ღურწკაია და მან მოიტანა ე.წ. ფლეშკა რომელზეც იყო პირადი ცხოვრების ამსახველი ფირი და წავიდა უარით. ღურწკაია თავის ჩვენებაში წერს, რომ მას ქონდა ანგარებითი მოტივი, ანუ მათ უნდა გაეყიდათ ეს ფირი და 1000 ლარი უნდა მიეღოთ ჩემგან, ესაა ღურწკაიას მორიგი ტყუილი. მოტივი იყო ძალიან მარტივი, დაგეგმილი იყო სპეცოპერაცია „ქრონიკა+“-ის წინააღმდეგ.
თუკი ჩემი მხრიდან მოხდებოდა ამ ფირის დატოვება, გამოქვეყნებაზე ლაპარაკი ზედმეტია. ისინი თავად გამოაქვეყნებდნენ და ამას მოყვებოდა ჩემი დაკავება. პირდაპირ გეუბნებით, რომ ეს სპეცოპერაცია პირდაპირ დაიგეგმა ირაკლი ღარიბაშვილის და მისი გარემოცვის მიერ.“- განაცხადა ელისო კილაძემ.
ამის შემდეგ გელა ღურწკაიამ ელისო კილაძეს სიტყვიერი შეურაცხყოფა მიაყენა და სტუდია დატოვა.
