ავარიების 40% ახალბედა მძღოლებზე მოდის
ორგანიზაცია „პარტნიორობა საგზაო უსაფრთხოებისთვის“ კვლევას აქვეყნებს. სტატისტიკიდან ჩანს, რომ ავტოსაგზაო შემთხვევათა 40% ახალბედა მძღოლების გამო ხდება.
„პირველი არის ახალბედა მძღოლების პრობლემა. ავარიების 40% ახალბედა მძღოლებზე მოდის, პრაქტიკული მეცადინეობა და გამოცდა დასახვეწია.
მეორე არის უსაფრთხო ინფრასტრუქტურის მოწყობა. თუ არ მოწესრიგდება გადასასვლელები და არ მოხდება სიჩქარის კონტროლი, ვერ ავიცილებთ ავარიებს.
მესამე არის, სტატისტიკა. მონაცემების შეგროვება უნდა გაუმჯობესდეს რომ გავიგოთ, რეალურად რა იწვევს ავარიებს.
მეოთხე კი არის, ცნობიერების ამაღლების კამპანიები, რომელიც უნდა იყოს უფრო მწვავე“, - განაცხადა ორგანიზაციის დამფუძნებელმა გელა კვაშილავამ.
სტატისტიკის თანახმად, ყოველწლიურად საქართველოში 600-მდე ადამიანი კვდება ავტოავარიებში. მიმდინარე წლის პირველ ორ თვეში კი 84 ადამიანი გახდა ავტოსაგზაო შემთხვევის მსხვერპლი, მათგან 19 ქვეითად მოსიარულე იყო.
