Ukraine International Airlines-ი (FlyUIA) საქართველოს მიმართულებით კიდევ ერთ სიხშირეს ამატებს. უკრაინული მედიის ინფორმაციით, FlyUIA 2017 წლის ზაფხულის სეზონზე ბათუმის საერთაშორისო აეროპორტშიც განახორციელებს ოპერირებას და ზაპოროჟიედან ბათუმის მიმართულებით იფრენს.
აღნიშნულ მიმართულებაზე ოპერირების დაწყების შესახებ უკრაინის საჰაერო ფრენების სახელმწიფო კომისიამ შესაბამისი გადაწყვეტილება უკვე დაამტკიცა.
FlyUIA ზაპოროჟიე-ბათუმის მიმართულებით ფრენების განხორციელებას 21 ივნისიდან დაიწყებს. ფრენები აღნიშნულ მიმართულებაზე კვირაში ორჯერ: ოთხშაბათობით და შაბათობით განხორციელდება. ფრენის ხანგრძლივობა 2 საათია.
ახალი მიმართულება ავიაკომპანიის ჯავშნის სისტემაში უკვე დამატებულია. ბილეთის ღირებულება, ერთი გზა, 3 ათასი გრინვადან ეღირება.
ზაპოროჟიე-ბათუმის რეისი FlyUIA-თვის საქართველოს მიმართულებით რიგით მეხუთე დანიშნულების პუნქტი იქნება. დღეისათვის FlyUIA საქართველოს მიმართულებით შემდეგ რეისებს ასრულებს: კიევი-თბილისი, კიევი-ქუთაისი და ხარკოვი-ქუთაისი. ივნისის დასაწყისიდან კი ავიაკომპანია ოდესა-ქუთაისის რეისსაც ამატებს.
