სარწმუნოება და ტრადიცია ეკლესიისგან განუყოფელია, - ბრძანა საქართველოს კათოლიკოს-პატრიარქმა საკვირაო ქადაგებისას სამების საკათედრო ტაძარში.
“დღეს არის დიდი დღესასწაული – ზეიმი მართლმადიდებლობისა. უპირველეს ყოვლისა, ჩვენ უნდა გვახსოვდეს, რომ მართლმადიდებლობა არის უდიდესი საუნჯე, რომელიც ღმერთმა ჩვენ გვაჩუქა, უდიდესი მადლი, რომელიც ჩვენ ღმერთმა მოგვცა. სარწმუნოება და ტრადიცია ეკლესიისგან განუყოფელია. 100 წლის განმავლობაში გრძელდებოდა ბრძოლა ხატების წინააღმდეგ. 100 წლის შემდეგ მეშვიდე მსოფლიო კრებამ განაწესა, რომ ხატის თაყვანისცემა კერპთაყვანისცემა არ არის. არამედ ეს არის მადლი ღვთისა, რომელსაც ღმერთი ადამიანს მოუვლენს. ჩვენ ქართველები ბედნიერები ვართ, რომ პირველმა ჩვენ მივიღეთ, ჩვენ ჩაგვაბარა ჩვენ გვაჩუქა და დაგვაჯილდოვა ხატებით უფალმა. გახსოვთ, როცა ყოვლადწმინდა ღვთისმშობელ დედას წილად საქართველო ერგო, მას მაცხოვარი გამოეცხადა და უთხრა: ხატი გაუგზავნე შენი და შემდეგ ეს ხატი იქნება საქართველოს მფარველიო, რადგან მოახლოებული არს შენი გარდაცვალება. ღვთისმშობელმა დედამ სახეზე მიიდო ფიცარი და ყოვლადწმინდა ღვთისმშობლის სახე გამოისახა. აწყურის ღვთისმშობელი გამოისახა მაცხოვართან ერთად. ეს იმას ნიშნავს, რომ ხატი არის სასუფევლის კარიბჭე, ხატის საშუალებით ჩვენ ვხედავთ სასუფეველს. მადლობა უფალს, რომ მან მრავალი ხატი გვაჩუქა, - ბრძანა პატრიარქმა. მისი თქმით, დარწმუნებულია, რომ ივერიის ყოვლადწმინდა ღვთისმშობლის ხატი საქართველოში ჩამობრძანდება.