თბილისის საკრებულოში დღეს გამართულ სხდომასთან დაკავშირებით უმრავლესობის წევრმა, ქონების მართვისა და საფინანსო-საბიუჯეტო კომისიის თავმჯდომარემ, ჯაბა სამუშიამ ისაუბრა.
ჯაბა სამუშია: „არასამთავრობო ორგანიზაციების განცხადებაში ძალიან კარგად არის აღნიშნული და ძალიან კარგად ჩანს, რომ არანაირ კორუფციულ გარიგებასთან არ გვაქვს საქმე. ეს არის სტიქიით დაზარალებული ოჯახისთვის ზარალის ანაზღაურება და ამიტომ ამ მიმართულებით საქმი წაყვანა მართებული არ არის.
ეს გადაწყვეტილება თბილისის საკრებულომ მიიღო 2016 წლის 23 დეკემბერს. დაახლოებით თვენახევრის მანძილზე არავის გახსენებია აღნიშნული საკითხი, არც არავის გაუპროტესტებია, აღარაფერს ვსაუბრობ მის გასაჩივრებაზე. ამ თემაზე საუბარი დაიწყო მხოლოდ მაშინ, როდესაც გარკვეულ პოლიტიკურ ჯგუფს დასჭირდა ამ საკითხზე პოლიტიკური სარჩულის დადება და ამ პრობლემის პოლიტიკურად შეფუთვა დაიწყეს. სინამდვილეში ნაზღაიძეზე საუბარი არ არის. დაზარალებული არის ჩოხელი და ეს ჩანს ყველა დოკუმენტიდან, რომელიც ჩვენ წარმოვადგინეთ. საზოგადოებას არაერთხელ ვაჩვენეთ აღნიშნული დოკუმენტები“, - აღნიშნა ჯაბა სამუშიამ.
მისი თქმით, ჯერ კიდევ 2013 წელს, როდესაც ჯერ არც სტიქია მომხდარა და იმ პერიოდისთვის თბილისის მთავრობაში ნაციონალური მოძრაობა იყო, თბილისის მერიაში აღნიშნულ მიწის ნაკვეთზე კოეფიციენტის მომატებასთან დაკავშირებით გამართულ სხდომაზე წარმომადგენლად სწორედ ზვიად ჩოხელი იყო. ასევე სტიქიის პერიოდში ყველა დოკუმენტი, რომელიც თბილისის მერიაში იყო წარდგენილი დაზარალებულად ცნობის მოთხოვნით, სწორედ ზვიად ჩოხელის სახელზე იყო.
„არანაირი ეჭვი ამ თემის სამართლებრივ ასპექტებთან დაკავშირებით არ არსებობს. როდესაც დოკუმენტაციაზეა საუბარი, დოკუმენტაციის ერთი ნაწილი მთლიანად ეფუძნება არა მერიის, ან საკრებულოს, არამედ სამხარაულის ექსპერტიზის ეროვნული ბიუროს მიერ არის შექმნილი. მიწის ნაკვეთი მთლიანად არის მოქცეული სტიქიის ზონაში და მისი ნაწილი საერთოდ წყალს აქვს წაღებული. სხვათაშორის მთლიანად ამ ზონაში ეს არის ერთადერთი ნაკვეთი, რომელზეც გაცემული იყო მშენებლობის ნებართვა, 2013 წელს კოეფიციენტი იყო მომატებული, ხოლო 2015 წელს, სტიქიამდე ორი კვირით ადრე, სამშენებლო კომპანიასთან იყო მემორანდუმი გაფორმებული“, - განაცხადა ჯაბა სამუშიამ.
