“გამოჩნდა ასეთი ალუზია, რომ ეკას სახით არის სტუდენტი, რომელიც 20 ტენდენციური, გაბოროტებული ლექტორის კითხვებს ისმენს. ”ქართულ ოცნებას” და ყველა ჩვენგანს ეკა ბესელიას სახით ჰყავს ის ადამიანი, რომელსაც შეუძლია ნებისმიერ შემოტევას გაუძლოს. ვსარგებლობ შემთხვევით და მადლობას ვუხდი ეკას გამძლეობისა და იმ ყველაფრისთვის, რაც მან გააკეთა”, - ამის შესახებ პარლამენტის პლენარულ სხდომაზე, ფარულ მოსმენა-მიყურადებასთან დაკავშირებული საკანონმდებლო პაკეტის მეორე მოსმენით განხილვის დასრულებისას საპარლამენტო უმრავლესობის წევრმა გედევან ფოფხაძემ განაცხადა.
მისი შეფასებით, მმართველმა გუნდმა კანონპროექტის მიღებისას იხელმძღვანელა იმ პრინციპით, რომ სახელმწიფო უნდა იყოს დაცული, უსაფრთხო და კანონში პრიორიტეტები სწორად არის განსაზღრული.
”ჩვენ არ დავუშვებთ იმას, რომ სახელმწიფოს ჰქონდეს სუსტი უსაფრთხოება და ვიღაცამ საკუთარ პოლიტიკურ ამბიციებსა და მოტივაციებს საჯარო ინტერესი გადააყოლოს. ეს არის ქვეყნის უსაფრთხოების დაცვა”, - აღნიშნა ფოფხაძემ.
პარლამენტმა ფარულ მოსმენა-მიყურადებასთან დაკავშირებული საკანონმდებლო პაკეტის მეორე მოსმენით განხილვა დაასრულა. საპარლამენტო უმცირესობამ დღევანდელ სხდომაში მონაწილეობა არ მიიღო. კანონპროექტზე ოპონირებით დღევანდელ სხდომაზე ენმ-ის წევრები გამოვიდნენ.
