27 აპრილს, საქართველოს ტურიზმის ეროვნული ადმინისტრაციის ორგანიზებით, რიგით მესამე საერთაშორისო სტუდენტური კონფერენცია გაიმართება, რომლის თემაც იქნება: ,,ტურიზმის განვითარების პერსპექტივები საქართველოში და სტრატეგიული მიზნები“.
აღნიშნულ კონფერენციაში მონაწილეობის მიღება შეუძლიათ უცხოეთში და საქართველოში აკრედიტებული უნივერსიტეტების ბაკალავრიატის, მაგისტრატურის და დოქტორანტურის სტუდენტებს. ასევე პროფესიულ სასწავლებლებსაც.
როგორც ტურიზმის ადმინისტრაციაში განმარტავენ, კონფერენციის მიზანია ხელი შეუწყოს უნივერსიტეტებისა და საქართველოს ტურიზმის ეროვნული ადმინისტრაციის თანამშრომლობის გაძლიერებას და სტუდენტების ჩართულობის ამაღლებას ქვეყანაში ტურიზმის განვითარების საკითხებში.
კონფერენცია სტუდენტებს შესაძლებლობას მისცემს ჩაატარონ ინდივიდუალური კვლევები, შესთავაზონ ახალი იდეები საქართველოში ტურიზმის პოლიტიკის მთავარ განმსაზღვრელ ორგანოს და ამით საკუთარი წვლილი შეიტანონ ტურიზმის სტრატეგიით განსაზღვრული მიზნების შესრულების საქმეში.
ნაშრომი უნდა ემსახურებოდეს საქართველოს ტურიზმის სტრატეგიაში წარმოდგენილი რვა სტრატეგიული მიზნიდან ერთ-ერთის ან რამდენიმეს შესრულებას. წარმოდგენილი იდეები აისახება ტურიზმის სამოქმედო გეგმაში და განხორციელდება.
დამატებითი ინფორმაციისათვის ეწვიეთ ტურიზმის ეროვნული ადმინისტრაციის ვებ-გვერდს: http://gnta.ge/conference/
