პრემიერ-მინისტრი გიორგი კვირიკაშვილი იმედს გამოთქვამს, რომ საქართველოსა და სომხეთს შორის კეთილმეზობლური ურთიერთობები კიდევ უფრო გაღრმავდება, რასაც ორი ქვეყნის მთავრობის მეთაურების რეგურალური შეხვედრებიც შეუწყობს ხელს.
ამის შესახებ კვირიკაშვილმა სომხეთის პრემიერ-მინისტრ კარენ კარაპეტიანთან შეხვედრის შემდეგ გამართულ ერთობლივი პრესკონფერენციაზე ისაუბრა.
მისი თქმით, შეხვედრაზე პრემიერ-მინისტრებმა ორ ქვეყანას შორის თანამშრომლობის ძირითადი მიმართულებები განიხილეს.
„გამოვხატეთ მზადყოფნა, გავაგრძელოთ რეგულარული შეხვედრები მაღალ დონეზე და ასევე ხელი შევუწყოთ ორი ქვეყნის დარგობრივ უწყებებს შორის მჭიდრო თანამშრომლობას. საქართველოსათვის სომხეთი წარმოადგენს სახელმწიფოს, რომელთანაც გვაკავშირებს კეთილმეზობლობის მრავალსაუკუნოვანი ტრადიციები და მყარი ხალხთაშორისი კავშირები.
2017 წელი გამორჩეულია ორ ქვეყანას შორის თანამედროვე ურთიერთობების ისტორიაში - წელს აღინიშნება დიპლომატიური ურთიერთობების დამყარების 25-ე წლისთავი. მთელი ამ წლების განმავლობაში, ჩვენ შევძელით გაგვემყარებინა ჩვენს ხალხებს შორის არსებული მეგობრული ურთიერთობები და გვეშენებინა ურთიერთსასარგებლო თანამშრომლობა. მიმდინარე წლის 2 აპრილს, სომხეთში დაგეგმილია საპარლამენტო არჩევნები. დარწმუნებუნი ვართ, რომ არჩევნები მაღალ დონეზე ჩატარდება, საერთაშორისო სტანდარტებთან და დემოკრატიულ ფასეულობებთან სრულ შესაბამისობაში და იქნება კიდევ ერთი ნაბიჯი გადადგმული ქვეყნის განვითარებისკენ. შეხვედრაზე განვიხილეთ ორ ქვეყანას შორის თანამშრომლობის ძირითადი მიმართულებები. მიმოვიხილეთ, როგორც სავაჭრო-ეკონომიკურ სფეროში არსებული მდგომარეობა, ასევე თანამშრომლობის შემდგომი განვითარების პერსპექტივები“, - განაცხადა გიორგი კვირიკაშვილმა.
ამასთან, კვირიკაშვილის განცხადებით, შეხვედრაზე საუბარი შეეხო რეგიონში არსებულ გამოწვევებსა და რეგიონული თანამშრომლობის განვითარების პერსპექტივებს.
„ბატონ პრემიერ-მინისტრს ჰქონდა საინტერესო შემოთავაზებები ორ ქვეყანას შორის სხვადასხვა სფეროში ერთიანი ბაზრის პოტენციალის ათვისებისა და კოოპერაციის შესახებ. ჩვენი მხრიდან გამოვხატეთ სრული მზადყოფნა ამ მიმართულებით აქტიურად ვიმუშაოთ და წავახალისოთ კერძო სექტორის წარმომადგენელი ორივე ქვეყნიდან, რათა მათ სრულად გამოიყენონ რეგიონალური კოოპერაციის პოტენციალი”, - აღნიშნა პრემიერმა.
სომხეთის პრემიერ-მინისტრი კარენ კარაპეტიანი საქართველოში ორდღიანი ვიზიტით იმყოფება.
