ოპოზიცია მთავარ პროკურორს და სახელმწიფო უსაფრთხოების სამსახურის ხელმძღვანელს პარლამენტში იბარებს.
”ევროპული საქართველოს” წევრი სერგი კაპანაძე აცხადებს, რომ აინტერესებთ, რა ზომები მიიღეს აღნიშნულმა უწყებებმა, რომლის ფარგლებშიც ანტიკორუფციული ბიურო შედის, მოსამართლე ნატა ნაზღაიძის საქმესთან დაკავშირებით.
”გამოვლინდა ფაქტები, რომელიც მაღალი დონის კორუფციას უკავშირდება. საუბარია მილიონიან კორუფციულ გარიგებაზე. იმის მიუხედავად, რომ ეს ორივე სტრუქტურა არის ვალდებული დაიწყოს გამოძიება და მიიღოს სათანადო ზომები, ჩვენ ამ თემაზე მათი მხრიდან არც ერთი განცხადება არ მოგვისმენია. ჩვენი მოთხოვნაა, მოვიდნენ პარლამენტში და ანგარიში ჩაგვაბარონ იმ თემასთან დაკავშირებით, რაც ბოლო ერთი კვირის განმავლობაში ისმის”, - განუცხადა ჟურნალისტებს სერგი კაპანაძემ.
