საპარლამენტო უმრავლესობის ლიდერმა დღეს გამართულ ბრიფინგზე განაცხადა, რომ სახეზეა გვარამია-ახვლედიანის მხრიდან სავარაუდო კორუფცია. მისი თქმით, დადასტურდა ჩანაწერის ავთენტუობაც და ისიც, რომ მასალა დამონტაჟებული არ არის.
„მასალა გვარამიამ თვითონ ჩაიწერა ფარულად, ის სასამართლოს თავმჯდომარეს მილიონებს სთავაზობდა. რუსთავი 2-ის გენერალური დირექტორი უხეშად ერეოდა სასამართლოს საქმიანობაში და ნათელი ხდება მისი პოლიტიკური ისტერიის მიზეზიც,"- განაცხადა არჩილ თალაკვაძემ.
მისი თქმით, გვარამია-ახვლედიანის სავარაუდო კორუფციის ფაქტზე ეფექტური გამოძიება უნდა ჩატარდეს.
ტელეკომპანია რუსთავი 2-ის გენერალური დირექტორი ნიკა გვარამია დღეს ცენტრალურ კრიმინალურ პოლიციაშია მოწმის სტატუსით გამოიკითხება. საქმე ეხება ნიკა გვარამიას და თბილისის საქალაქო სასამართლოს ყოფილი თავმჯდომარის მამუკა ახვლედიანის საუბრის ჩანაწერს.საგამოძიებო უწყებაში განმარტავენ, რომ შესაბამისი საექსპერტო დასკვნის საფუძველზე, გვარამია- ახვლედიანის 30-წუთის ხანგრძლივობის აუდიო-ფაილის ავთენტურობა დასტურდება, სადაც ნიკა გვარამია მოსამართლეს 6 მილიონიდან წილს პირდება.