პარლამენტის სპორტისა და ახალგაზრდულ საქმეთა კომიტეტის თავმჯდომარის მოადგილედ ირაკლი აბუსერიძე აირჩიეს. მისი ხელახლა არჩევის საკითხი დღის წესრიგში პარლამენტში ახალი ფრაქციების შექმნისა და შესაბამისად კვოტების ხელახალი გადანაწილების გამო დადგა. ირაკლი აბუსერიძის კანდიდატურა უმრავლესობის კვოტით იყო წარდგენილი, რასაც კომიტეტმა ერთხმად დაუჭირა მხარი.
კომიტეტის თავმჯდომარემ, მიხეილ ყაველაშვილმა საგაზაფხულო სეისის განმავლობაში კომიტეტის სამუშაო გეგმებთან დაკავშირებით ისაუბრა, მისი თქმით, „ჩვენ ბევრი საქმე გვაქვს გასაკეთებელი, მათ შორის მისაღებია „კანონი სპორტის შესახებ", ახალი ურთიერთობებია დასამყარებელი ფედერაციებთან, სპორტული სამყაროს ერთიანობის გარეშე ჩვენი წარმატებები წარმოუდგენელია, ამიტომ პრინციპი, რომელიც ჩვენ ავირჩიეთ, არის გაერთიანება და სტაბილურობა, განვიხილავთ ფედერაციების სტრატეგიებსა და გეგმებს. ასევე აქტუალურია კომიტეტთან საკონსულტაციო საბჭოს შექმნაც, რომელიც ახლო მომავალში განიხილება და გადაწყდება. კომიტეტს ბევრი სამუშაო აქვს და ყველამ ერთად უნდა ვაკეთოთ საქმე", -განაცხადა კომიტეტის თავმდომარემ.