16-17 თებერვალს საგამოფენო ცენტრში „ექსპოჯორჯია“უმაღლესი და პროფესიული განათლების, საზღვარგარეთ სწავლისა და სტუდენტური სერვისების მე–7 საერთაშორისო გამოფენა – International Education Fair Georgia 2017 გაიმართება.

გამოფენის ფარგლებში 100-მდე მონაწილე უნივერსიტეტი, საერთაშორისო საგანმანათლებლო ცენტრი და პროფესიული კოლეჯი იქნება წარმოდგენილი 16 სხვადასხვა ქვეყნიდან. დამთვალიერებლებს საშუალება ექნებათ მიიღონ ამომწურავი ინფორმაცია საქართველოსა და მსოფლიოში არსებული საბაკალავრო, სამაგისტრო და სადოქტორო პროგრამების, გაცვლითი პროგრამების, სტიპენდიების, გრანტებისა და სწავლის დაფინანსების შესაძლებლობების შესახებ.

მონაწილე ქვეყნები: საქართველო, ლიტვა,  ლატვია,  ესტონეთი,  პოლონეთი,  გერმანია, რუმინეთი, თურქეთი, უკრაინა, ინგლისი, აშშ, რომანია, რუსეთი, ჩეხეთი, ესპანეთი, ირლანდია.

გამოფენის სტუმრები შესძლებენ პირისპირ შეხვდნენ და გაესაუბრონ მონაწილე უნივერსიტეტებისა და ორგანიზაციების წარმომადგენლებს, მიიღონ პასუხები მათთვის საინტერესო შეკითხვებზე და ყველა საჭირო ინფორმაცია  ბაკალავრიატზე, მაგისტრატურაზე, პროფესიულ თუ სადოქტორო პროგრამებზე სწავლის გაგრძელების შესახებ გადაწყვეტილების მისაღებად.

ღონისძიებაზე წარმოდგენილი იქნება: უმაღლესი სასწავლებლები, საგანმანათლებლო სააგენტოები, საერთაშორისო ორგანიზაციები და ფონდები, სტუდენტური სერვისები, ტრეინინგ ცენტრები, უცხო ენების სასწავლო ცენტრები და სხვა საგანმანათლებლო დაწესებულებები, ასევე საელჩოების მიერ წარმოდგენილი სასწავლო პროგრამები.

განათლების საერთაშორისო გამოფენა ყოვეწლიური ღონისძიებაა, მას 12 000–ზე მეტი ადამიანი სტუმრობს და რაოდენობა მუდმივად იზრდება. გამოფენის ოფიციალური გახსნა შედგება 16 თებერვალს 11:00 საათზე მე-11 პავილიონში.

გამოფენას ოფიციალურად გახსნის საქართველოს განათლებისა და მეცნიერების მინისტრი, ბატონი ალექსანდრე ჯეჯელავა.