საქართველოს შრომის, ჯანმრთელობისა და სოციალური დაცვის სამინისტროში 2016 წელს ანაზღაურების სახით 4 273 742 ლარი გაიცა. ამ თანხის 63 პროცენტი - 2 678 329 ლარი თანამშრომლებისთვის გაცემული თანამდებობრივი სარგოა, დარჩენილი 1 595 413 ლარი კი - პრემია და დანამატები. ამის შესახებ პორტალი On.ge ავრცელებს.
მინისტრის, დავით სერგეენკოს შემოსავალი გასულ წელს 75 ათასი ლარი იყო, საიდანაც 32 520 ლარი დანამატი იყო. სერგეენკომ ამ თანამდებობაზე ყოფნისას 326 ათას ლარზე მეტი გამოიმუშავა. ყველაზე მეტი შემოსავალი, 90 165 ლარი, მან 2013 წელს აიღო. ამ წელს მინისტრმა პრემიისა და დანამატის სახით თანამდებობრივ სარგოზე მეტი შემოსავალი მიიღო.
2016 წელს მინისტრს სამი მოადგილე ჰყავდა, რომელთაც ჯამურად 215 285 ლარი გამოიმუშავეს, საიდანაც ნახევარზე მეტი, 117 365 ლარი, პრემია და დანამატია. სამმართველოების ხელმძღვანელებმა, დეპარტამენტების ხელმძღვანელებმა და მათმა მოადგილეებმა, ჯამში, 1 541 155 ლარის ოდენობით ანაზღაურება აიღეს, საიდანაც ნახევარზე ნაკლები - 693 294 ლარი პრემია და დანამატია. უწყების სხვა თანამშრომლებმა 2 442 302 ლარი გამოიმუშავეს, საიდანაც თითქმის მესამედია (752 234 ლარი) პრემია და დანამატები.
ბოლო 5 წელში უწყებაში ყველაზე დიდი ოდენობით ანაზღაურება 2012 წელს გაიცა, ყველაზე ნაკლები - 2014-ში. ამავე პერიოდში უწყებაში გაცემული პრემიები და დანამატები არასდროს უსწრებდა თანამდებობრივი სარგოსთვის გადახდილ თანხებს. 2012 წელს ყველაზე მეტი პრემია გაიცა, თუმცა, დანამატი საერთოდ არ გაცემულა. ამ წელს გაცემული პრემიის მოცულობა აღემატება ყოველ მომდევნო წელს გაცემული პრემიისა და დანამატის ჯამს.
2012 წლიდან უწყებაში გაცემული პრემიების რაოდენობა ყოველწლიურად იკლებდა, თუმცა, დანამატები იზრდებოდა. 2016 წელს დანამატები პრემიებს თითქმის 3-ჯერ აღემატებოდა.
