ვიცი, უკანონო მოსმენებს ადგილი აქვს, - განაცხადა "ნაციონალური მოძრაობის" ერთ-ერთმა ლიდერმა, რომან გოცირიძემ პარლამენტის პლენარულ სხდომაზე ფარული მოსმენების საკანონმდებლო პაკეტის განხილვისას.
"მეტყვით, რომ არა. ვის უფრო დაეჯერება, განსაზღვროს საზოგადოებამ. ვის მიმართაც გვაქვს ეჭვი, დაასაბუთონ, რომ არ უსმენენ. თუ არავის უსმენენ, მაშინ არსებული სტრუქტურა რატომ უნდა შეიცვალოს. ვიცი ერთი ძალიან ეჭვიანი შეყვარებული, რომელიც თავის საყვარელს უსმენს. გინდ დამიჯერეთ, გინდ - არა", - აღნიშნა გოცირიძემ.
ოპოზიციონერ დეპუტატს საკითხზე მომხსენებელი, ეკა ბესელია გამოეხმაურა და აღნიშნა, რომ მოსმენების შესახებ ინფორმაცია შესაბამის სამსახურებს უნდა მიეწოდებოდეს.
"თუ გაქვთ ინფორმაცია, რომ ადამიანის პირად ცხოვრებაში უკანონოდ ერევიან, უსმენენ, იქნება შეყვარებული თუ საძულველი ადამიანი, რა მნიშვნელობა აქვს, უნდა აცნობოთ შესაბამის სამსახურებს. ფაქტებით საუბარი გაცილებით რაციონალურია, ვიდრე - ეჭვებით საუბარი. ეჭვებიც მესმის, ამისგან გათავისუფლება საზოგადოებას ძალიან გაუჭირდება, ისეთ მძიმე ფონი იყო წლების წინ", - მიმართა ბესელიამ გოცირიძეს.
