თურქეთის მთავრობის გადაწყვეტილებით სახელმწიფო კომპანიების ნაწილი თურქეთის აქტივების ფონდს გადაეცა. თურქული მედია წერს, რომ აქტივების ფონდს გადაეცა ეროვნული ავიაგადამზიდავის Turkish Airlines-ის აქციათა 49,12%-ი და ასევე ქვეყნის უმსხვილესი ბანკის Halkbank-ის აქციათა 51,11%-ი.
ფონდის მართვაში გადავიდა ასევე სატელეკომუნიკაციო ოპერატორის Turk Telekom-ის აქციათა 6,68%-ი. ფონდის მფლობელობაში მოხვდა ასევე Ziraat Bankasi-ს, Borsa Istanbul-ის, Turkish Petroleum-ის (TPАО), BOTAŞ-ის, Türksat-ისა და Çaykur-ის აქციათა ნაწილიც.
აქტივების ფონდი 2016 წლის სექტემბერში დაფუძნდა.
ფონდის კაპიტალი 50 მლნ თურქულ ლირას შეადგენს. ნავარაუდევია, რომ უახლოეს ხანებში ფონდის კაპიტალი 200 მლნ თურქულ ლირამდე გაიზრდება
სწორედ ამ ფონდის დაფინანსებით მოხდება არხის „სტამბოლის“, სტამბოლის მესამე აეროპორტის, სწრაფი რკინიგზის და სხვა მნიშვნელოვანი პროექტის გაშვება.
პრემიერ-მინისტრის აპარატში გაკეთებული განცხადების მიხედვით, თურქეთის აქტივების ფონდისათვის გადაცემული კომპანიების ფუნქციონირება არსებული მართვის პოლიტიკის, საქმიანი გეგმის, საინვესტიციო და ზრდის პოლიტიკის შესაბამისად გაგრძელდება.
ასევე გადაწყდა ხაზინის კუთვნილი ანტალიაში, აიდინში, სტამბოლში, ისპარტაში, იზმირში, ქაისერსა და მუღლაში მდებარე ზოგიერთი უძრავი ქონების თურქეთის აქტივების ფონდისათვის გადაცემა.
