აჭარის განათლების, კულტურის და სპორტის მინისტრის ყოფილი მოადგილე ნათია სირაბიძე ევროპის კულტურის პარლამენტის შესარჩევმა კომიტეტმა პარლამენტის ახალ წევრად აირჩია. ნათია სირაბიძე საზოგდოებასთან ურთიერთობის სპეცილისტია. მისი კანდიდატურის წარდგენა ბათუმში, 2016 წლის ოქტომბერში გამართულ ევროპის კულტურის პარლამენტის გასვლით სხდომაზე სიტყვით გამოსვლის შემდეგ მოხდა.
„ჩემთვის საამაყოა და დიდი პატივია, რომ ამირჩიეს. ვფიქრობ ძალიან გამიმართლა, რადგან ამ ორგანიზაციის წევრებს დიდი მიღწევები აქვთ კულტურის სფეროში თავიანთ ქვეყნებში. აჭარა საქართველოში ერთ-ერთი ძლიერი კულტურული ცენტრია და რეგიონს სამომავლოდ უფრო დიდი როლის შესრულება შეუძლია კულტურათა შორის დიალოგის და კულტურის დიპლომატიის მხრივ.“ - განაცხადა ჩვენთან საუბრისას ევროპის კულტურის პარლამენტის ახლადარჩეულმა წევრმა ნათია სირაბიძემ.
აევროპის კულტურის პარლამენტში საქართველოდან ხუთი წევრია: რუსუდან ფეტვიაშვილი, ლევან ხეთაგური, დავით საყვარელიძე, დავით ლორთქიფანიძე და ნათია სირაბიძე. წელს ევროპის კულტურის პარლამენტის პირველი სხდომა მაისში ჰოლანდიაში, ქ. როტერდამში გაიმართება.
ევროპის კულტურული პარლამენტი 2001 წელს ევროპის საბჭოს შენობაში, სტრასბურგში დაარსდა და მის მთავარ მიზანს წარმოადგენს აღმოსავლეთ და დასავლეთ ევროპის ქვეყნების დაკავშირება, კულტურის სფეროში იდეებისა და ინიციატივების ხელშეწყობა. ორგანიზაცია აერთიანებს 160 წევრს ევროპის 43 ქვეყნიდან. ევროპის კულტურის პარლამენტის წევრები არ წარმოადგენენ რომელიმე ორგნიზაციას, არამედ არიან თვიანთი ქვეყნის წარმომადგენლად ევროპაში კულტურის პოლიტიკის შემუშავებისას.
რაც შეეხება ნათია სირაბიძეს, ის არის პიარისა და მარკეტინგის სპეციალისტი, ამჟამად ლექციებს კითხულობს შოთა რუსთაველის სახელმწიფო უნივერსიტეტსა და გრ. რობაქიძის უნივერსიტეტში. ის გახლავთ ბიზნეს ადმინისტრირების დოქტორანტი (BSU), მასობრივი კომუნიკაციის მაგისტრი (UCF, აშშ) და ჟურნალისტიკისა და მედია მენეჯმენტის მაგისტრი (GIPA). აქვს პიარში ხელმძღვანელ თანამდებობებზე მუშაობის 8-წლიანი გამოცდილება, მათ შორის საქართველოს საკონსტიტუციო სასამართლოსა და აჭარის ავტონომიური რესპუბლიკის მთავრობაში.
იყო აჭარის განათლების, კულტურისა და სპორტის მინისტრის მოადგილე. კითხულობდა ლექციებს ამერიკისა და აზიის ქვეყნებში. 10 წლის განმავლობაში მუშაობდა სხვადასხვა თანამდებობაზე ბეჭდურ, რადიო და ტელე მედიაში. არის სამეცნიერო ნაშრომებისა და საჯარო გამოსვლის სახელმძღვანელოს "წარმატების გასაღები" ავტორი; გავლილი აქვს პროფესიული ტრენინგები ამერიკის, ევროპისა და აზიის ქვეყნებში. არის საერთაშორისო ჟურნალისტთა ასოციაციის წევრი, მედია მენეჯერთა საერთაშორისო კლუბის წევრი და სან დიეგოს (კალიფორნია) საპატიო მოქალაქე.
