საკონსტიტუციო სასამართლოს მოსამართლის ვაკანტურ თანამდებობაზე საპარლამენტო უმრავლესობის ერთ-ერთი ლიდერის მანანა კობახიძის კანდიდატურა განიხილება. ამის შესახებ ინფორმაციას თავად კობახიძე ადასტურებს.
დეპუტატი კურიერთან საუბრისას ამბობს, რომ მმართველ გუნდში აღნიშნულ საკითხზე კონსულტაციები უკვე დასრულებულია, თუმცა მანანა კობახიძე აცხადებს, რომ დამატებით ინფორმაციას ამ საკითხზე ფრაქცია ქართული ოცნების თავმჯდომარე გაავრცელებს.
„გიდასტურებთ, რომ ასეა, მაგრამ სჯობს დაუკავშირდეთ ფრაქციის ხელმძღვანელს მამუკა მდინარაძეს და ის გეტყვით იმიტომ, რომ ის არის უფლებამოსილი ამ თემაზე,“ - აცხადებს კობახიძე.
მამუკა მდინარაძის განცხადებით კი, ვაკანტურ თანამდებობაზე ოპტიმალურ გადაწყვეტილებას უახლოეს დღეებში მიიღებენ.
თუმცა, არ არის გამორიცხული, მანანა კობახიძის კანდიდატურა ბიუროს დღევანდელ სხდომაზეც წარადგინონ.
„ერთ-ერთი არის ქალბატონი მანანა. ჩვენ ვცდილობთ, რომ წარვადგინოთ საკონსტიტუციო სასამართლოს მოსამართლედ, რომელიც იქნება პროფესიონალი. იქნება მოლოდინი, რომ ის შეძლებს ობიექტურობას და ასევე მნიშვნელოვანი ფაქტორია, რომ მან მიიღოს უმრავლესობის მხარდაჭერა. ამიტომ, ამ კრიტერიუმების გათვალისწინებით ვცდილობთ, რომ შევძლებთ ოპტიმალური კანდიდატურის არჩევას,“ - განაცხადა მამუკა მდინარაძემ.