სამშენებლო კოეფიციენტების გაყიდვის შესაძლებლობა აღარ იარსებებს, - აღნიშნულს ითვალისწინებს “სივრცითი მოწყობისა და მშენებლობის კოდექსის“ პროექტი და “ადგილობრივი მოსაკრებლების შესახებ“ კანონში დაგეგმილი ცვლილებები, რომელიც განსახილველად მთავრობამ პარლამენტს უკვე წარუდგინა.
კანონის ის მუხლი, რომელიც ადგენს ასეთი შეთანხმებისათვის მოსაკრებლის გადახდას და მისი დაანგარიშების წესს, პარლამენტში წარდგენილი პროექტის მიხედვით, უქმდება.
ცვლილებათა ამავე პაკეტის მიხედვით, სპეციალური (ზონალური) შეთანხმება და მასთან დაკავშირებული მოსაკრებელი, შესაძლოა გაუქმდეს.
პროექტით, ასევე უქმდება მშენებლობის სახელმწიფო-ტექნიკური ზედამხედველობა და მასთან დაკავშირებული მომსახურების მოსაკრებელი.
ამასთან, აღნიშნულ კანონს უკუძალა არ ექნება და მოსაკრებლის გაანგარიშებასა და გადახდის წესთან დაკავშირები, კანონის ძალაში შესვლამდე არსებული წესები იმოქმედებს.
პროექტის განმარტებით ბარათშია აღნიშნული, რომ ეს განპირობებულია იმ გარემოებით, რომ ერთი მხრივ, ზიანი არ მიადგეს დაინტერესებულ პირს, რომელმაც უკვე მიაღწია მუნიციპალიტეტთან შეთანხმებას, გასწია ხარჯები, განახორციელა იურიდიული მნიშვნელობის მოქმედებები, ხოლო მეორე მხრივ, მუნიციპალიტეტმა არ დაკარგოს უფლება, მოსთხოვოს შეთანხმების მეორე მხარეს მიღებული სარგებლისთვის - კოეფიციენტის ყიდვისათვის შესაბამისი საფასურის გადახდა.