აჭარის ფინანსთა და ეკონომიკის მინისტრმა ახალი სასწავლო წელი მის მიერ დამთავრებულ ხელვაჩაურის პირველ საჯარო სკოლას მიულოცა. საკუთარ პედაგოგებს და პირველკლასელებს რამაზ ბოლქვაძემ სიტყვით მიმართა და მათ წარმატებული სასწავლო წელი უსურვა.
"ახალი სასწავლო წლის დაწყებას გილოცავთ თითოეულ მოსწავლეს, პედაგოგს, მშობელს და ყველა იმ ადამიანს ვისთვისაც დღევანდელი დღე მნიშვნელოვანია.
მოხარული ვარ, რომ წლების შემდეგ სასწავლო წლის დაწყებას ისევ ჩემს მშობლიურ სკოლაში ვხვდები,რომელიც წელს 50 წლის ხდება და მინდა მოგილოცოთ არსებობის ნახევარსაუკუნოვანი ისტორია.
დღეს დიდი სიამაყით შემიძლია ვთქვა, რომ ჩემი ყველა შემდგომი წარმატება მნიშვნელოვნად სწორედ აქ გატარებულმა წლებმა განაპირობა.
გილოცავთ ამ სკოლის ძალიან ღირსეულ, გამორჩეულ და მისაბაძ პედაგოგებს დღევანდელ დღეს და გისურვებთ, რომ კიდევ არაერთი ღირსეული მოქალაქე აღუზარდოთ ქვეყანას.
ამ შესანიშნავი სკოლის მოსწავლეებს, განსაკუთრებით პირველკლასელებს, რომლებიც დღეს იწყებთ ცხოვრების ძალიან მნიშვნელოვან ეტაპს, კიდევ ერთხელ გილოცავთ ახალი სასწავლო წლის დაწყებას და გისურვებთ ნაყოფიერ წელს. ნათელი მომავალი გქონდეთ და გეცხოვროთ ძლიერ და ერთიან ქვეყანაში".
აჭარის ფინანსთა და ეკონომიკის მინისტრი სკოლის საზეიმო ღონისძიებას დაესწრო. მოგვიანებით რამაზ ბოლქვაძემ სკოლის მუზეუმი დაათვალიერა და სკოლის სპეციალურ წიგნში ჩანაწერი დატოვა.
ახალი სასწავლო წელი ხელვაჩაურის პირველ საჯარო სკოლაში საქართველოს ჰიმნით და სახელმწიფო დროშის აღმართვით გაიხსნა. ღონისძიებას ხელვაჩაურის მუნიციპალიტეტის გამგებელი ნადიმ ვარშანიძე ესწრებოდა.
ხელვაჩაურის პირველ საჯარო სკოლა წელს დაარსებიდან 50 წელს ზეიმობს. სკოლაში 750 მოსწავლე სწავლობს და წელს სულ 74 პირველკლასელი ჰყავს
