ექს-პრემიერ ბიძინა ივანიშვილის ინფორმაციით, გამოკითხვების თანახმად, ყველაზე მეტი მხარდამჭერი “ნაციონალურ მოძრაობას“ სამეგრელოში ჰყავს. გადაცემაში “შეხვედრები რეგიონულ მედიასთან“ მან აღნიშნა, რომ ამის მიუხედავად დარწმუნებულია, „ქართული ოცნების“ გამარჯვებაში.
ივანიშვილმა იმედი გამოთქვა, რომ სამეგრელოში არჩევნები 2012 წლის მსგავსად აღარ ჩატარდება და ძალადობა აღარ იქნება.
“ბრძოლა 2012 წელს გავიარეთ და იმედი მაქვს, ბრძოლის ნაცვლად ახლა კულტურულ არჩევნებს ჩავატარებთ. ზუგდიდში კორცხელის ინციდენტზე გამოძიება არ დასრულებულა, თუმცა ის მანქანები, რომელშიც ხელკეტები იდო, კარგად ჩანდა. პროფესიონალები არიან პროვოკაციის დაგეგმვაში, “ქართულ ოცნებას" მართებს დიდი სიფრთხილე. კამერები უნდა იყოს ძალიან ბევრი ამ არჩევნებზე, ისევე როგორც იყო 2012 წელს. სახელმწიფო სტრუქტურებიდან, პოლიციიდან მოდიოდა ძალადობა. ასეთი დღეს აღარ ხდება, თუმცა ფხიზლად უნდა იყოს თითოეული ამომრჩეველი“,-განაცხადა ივანიშვილმა.
