"რუსთავი 2"-ის გენერალური დირექტორის ნიკა გვარამიას განცხადებით, უზენაესი სასამართლოსგან არათუ საჩივრის დასაშვებად ცნობას, არამედ მანამდე მიღებული ქვემდგომი ინსტანციების სასამართლოების გადაწყვეტილების გაუქმებას ელოდება. ნიკა გვარამიას თქმით, უზენაესი სასამართლოს ამ შემადგენლობამ, რომელიც “რუსთავი 2“-ის საქმეს იხილავს, ერთი თვით ადრე, ანალოგიურ, თუმცა გაცილებით უფრო რთულ საქმეზე ქვემდგომი ინსტანციების გადაწყვეტილება გააუქმა და საქმე განსახილველად სააპელაციო სასამართლოს დაუბრუნა. გვარამიას განმარტებით, ერთი თვის წინ უზენაესი სასამართლოს ამ შემადგენლობამ გადაწყვეტილება მიიღო ფოთის საზღვაო ნავსადგურის და თამაზ ნიჟარაძის საქმეზე, სადაც დაადგინა, რომ ფასის დისპროპორციის გამო არ შეიძლება ნასყიდობის ხელშეკრულების ბათილად ცნობა.
“ჩვენს საქმეზე ფასის დისპროპორციულობა უკანონოდაა დადგენილი, მაგრამ მიუხედავად ამისა, ამ შემადგენლობამ დაადგინა და საქმე დააბრუნა სააპელაციო სასამართლოში. ამავე შემადგენლობას არ შეუძლია განსხვავებული გადაწყვეტილების მიღება“,-განაცხადა გვარამიამ და უზენაესი სასამართლო ტერორში დაადანაშაულა. “ტერორია როდესაც თანამშრომლებს მოლოდინის რეჟიმში ამყოფებ როდის შემოვა გასამხედროებული ფორმირება რომ "რუსთავი 2" დაიკაონ. მოვუწოდებ საჯაროდ გააკეთოს უზენაესის სპიკერატმა განმარტებები, ვინაიდან ეს საქმე მაღალი საზოგადოების ინტერესის მქონეა. უკვე მესამე დღეა ზეპირი მოსმენის გარეშე იხილავენ საჩივრის წარმოებაში მიღების საკითხს“,-განაცხადა გვარამიამ და აღნიშნა, რომ მათი მთავარი კოზირი არა ირაკლი ოქრუაშვილის მიერ წარდგენილი დოკუმენტი, არამედ “რუსთავი 2“-ის მფლობელების სამართლებრივი არგუმენტებია.
“რუსთავი 2“-ის გენერალური დირექტორის თქმით, ოქრუაშვილის მიერ წარდგენილი დოკუმენტი ადასტურებს, რომ ქიბარ ხალვაში ტელეკომპანიის კანონიერი მფლობელი არასდროს ყოფილა და საკუთრების უფლების დარღვევაზე საუბარი ზედმეტია.
