საქართველოს თავდაცვის მინისტრი სენაკში, II ქვეითი ბრიგადის ბაზაზე მიმდინარე მედიასწავლება „ღირსეული პასუხი 2016“-ის დასკვნით ეტაპს დაესწრო.
იმიტირებულ საბრძოლო ველზე დაგეგმილ იმიტირებულ ბრიფინგზე ასევე იმიტირებული თავდაცვის მინისტრის ნაცვლად ჟურნალისტებთან მოულოდნელად თინათინ ხიდაშელი მივიდა. საქართველოს თავდაცვის მინისტრმა მადლობა გადაუხადა მონაწილე ჟურნალისტებს და სწავლების დეტალებს გაეცნო.
თინათინ ხიდაშელთან ერთად მედიასწავლება „ღირსეული პასუხი 2016“-ის დახურვას გენერალური შტაბის უფროსის მოადგილე, პოლკოვნიკი ნიკოლოზ აგლაძე და სახმელეთო ჯარების დასავლეთ სარდლობის სარდალი, პოლკოვნიკი შალვა ჯაბახიძე დაესწრნენ.
„დიდი სურვილი გვქონდა, რეზერვის მომზადების ექსპერიმენტული ფაზა დაგვეწყო. უკვე ოთხი თვეა საზოგადოებას ვესაუბრებით რეზერვის მნიშვნელობაზე და იმ ახლებურ მიდგომაზე, რომელიც თავდაცვის სამინისტროს აქვს. მედიარეზერვი ამ პოლიტიკის ნაწილია. დღეს, 21-ე საუკუნის გამოწვევების კვალობაზე, როდესაც კონვენციური ომი გარკვეულწილად ჰიბრიდულმა ომმა ჩაანაცვლა, მედიაშტურმი, დეზინფორმაციული ომი, დეზინფორმაციული კამპანიები და პროპაგანდისტული მანქანა არის ერთ-ერთი უმნიშვნელოვანესი გამოწვევა და ერთ-ერთი უმნიშვნელოვანესი პრობლემა ნებისმიერი ქვეყნისთვის. ჩვენ გვინდა დავეხმაროთ ქართულ მედიას ამ გამოწვევებთან გამკლავებაში. ჩვენი ამოცანა არის ელემენტარული ინფორმაციის მიწოდება, როგორ გავყოთ და განვასხვავოთ ერთმანეთისგან ინფორმაცია და დეზინფორმაცია. როგორ მოვახერხოთ, რომ გადამოწმების რაც შეიძლება მეტი წყარო შევქმნათ იმისთვის, რომ ჟურნალისტს არ შეექმნას დაბრკოლება თავისი პროფესიული საქმიანობის განხორციელებაში. ჩვენი ამოცანაა, ჟურნალისტს არასოდეს არ მოუხდეს ტყუილის თქმა. თუმცა სახელმწიფო ვალდებულია, ყოველთვის მისცეს ჟურნალისტს საშუალება, გადაამოწმოს ინფორმაცია. ჩვენ გვიყვარს ხოლმე მედიაზე შეტევა, როდესაც რაღაც მცდარად შუქდება, ოღონდ, გვავიწყდება, რომ ერთ-ერთი მიზეზი ის არის, რომ ხანდახან ჩვენ თვითონ არ ვაძლევთ მედიას საშუალებას, ჰქონდეს სრული ინფორმაცია. ეს სწავლება პირველ რიგში ამ მიმართულებით წარიმართა,“ - განაცხადა თინათინ ხიდაშელმა.
მედიასწავლება "ღირსეული პასუხი 2016“ სენაკში, II ქვეითი ბრიგადის ბაზაზე ხუთი დღის განმავლობაში მიმდინარეობდა. პროექტის მონაწილე ჟურნალისტები და ოპერატორები სამხედრო ბაზაზე აქტიურ სწავლებას გადიოდნენ. სწავლების ფორმატი მორგებული იყო ჟურნალისტთა საქმიანობის რიტმს. სწავლების ფარგლებში სხვადასხვა სახის პრესკონფერენციები და ბრიფინგები გაიმართა. სწავლებაში მონაწილე ჟურნალისტებსა და ოპერატორებს ინფორმაციის მოპოვება და გავრცელება სტრესულ რეჟიმში უწევდათ ფსიქოლოგებისა და სამხედრო ექსპერტების მეთვალყურეობის ქვეშ, ამ ტიპის მეცადინეობების მიზანი რეალურ სიტუაციებში სტრესისა და შიშის გამკლავებაა. სწავლების სცენარიდან გამომდინარე, პროექტის მონაწილეებმა ხუთი დღის განმავლობაში 1000-ზე მეტი ახალი ამბავი მოამზადეს. „გამთამაშებლები“ კი მონაწილეებისთვის საინფორმაციო ველში რეალობასთან მაქსიმალურად მიახლოებულ სიტუაციებს, ასევე ტექნიკური და შინაარსობრივი ხასიათის ბარიერებს ქმნიდნენ. სწავლების მონაწილეებს აქტიური საინფორმაციო და კონვენციური ომის მიმდინარეობის მოდელირებისას შესაბამისი უნარ-ჩვევების დახვეწისა და კვალიფიკაციის ამაღლების საშუალება მიეცათ.
