თბილისის ზღვაზე, ე.წ „ოლიმპიურ სოფელში“, ახალაშენებულ კორპუსში ბინა კიდევ 100 დევნილ ოჯახს გადაეცა.
თბილისის მერმა დავით ნარმანიამ და საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა დევნილ ოჯახებს ახალი ბინის გასაღებები გადასცეს და ახალმოსახლეობა მიულოცეს.
მერიის ინფორმაციით, ბოლო ორი წლის განმავლობაში, თბილისში 17 ნგრევადი ან სიცოცხლისათვის საფრთხის შემცველი ობიექტი დაიხურა და იქ მცხოვრებ ოჯახებს ბინები ახალ კორპუსებში გადაეცათ.
ამ დრომდე, თბილისში ახალაშენებულ კორპუსებში საცხოვრებელი ფართი უკვე 591-მა დევნილმა ოჯახმა მიიღო, მათ შორის 330-მა თბილისის ზღვაზე.
2016 წლის ბოლომდე კი, „ოლიმპიურ სოფელსა“ და მენაშენეებისგან გამოსყიდულ ახალაშენებულ კორპუსებში ბინის მფლობელი 400 დევნილი ოჯახი გახდება.
