დასაქმებული კანდიდატები „ჯიპიაი ჰოლდინგის“ ტრენინგ ცენტრში გადამზადების ინტენსიურ კურსს გადიან
შრომის, ჯანმრთელობისა და სოციალური დაცვის მინისტრის მოადგილემ ზაზა სოფრომაძე და „ჯიპიაი ჰოლდინგის“ გენერალური დირექტორი პაატა ლომაძე სადაზღვევო კომპანია „ჯიპიაი ჰოლდინგის“ მასშტაბური დასაქმების ფორუმის შედეგებს მედიას გააცნობენ.
სადაზღვევო კომპანია „ჯიპიაი ჰოლდინგმა“ საცალო გაყიდვების სპეციალისტის ვაკანსიაზე კანდიდატურების გადარჩევა დაასრულა. დასაქმების ფორუმი მიმდინარე წლის აპრილში გაიმართა.
2016 წლის 21 აპრილს „ჯიპიაი ჰოლდინგის“ დასაქმების ფორუმზე, გაყიდვების სპეციალისტის ვაკანსიაზე დაინტერესება 1500-მდე ადამიანმა გამოთქვა. სადაზღვევო კომპანიის წარმომადგენლები ფორუმის თითოეულ მონაწილეს გაესაუბრნენ და დეტალური ინფორმაცია მიაწოდეს სამუშაოს შესახებ. საბოლოოდ 212 კანდიდატი შეირჩა, რომლებიც „ჯიპიაი ჰოლდინგის“ ტრენინგ ცენტრში გადამზადების ინტენსიურ კურსს გადიან. შერჩეული კანდიდატებიდან 43 სოციალური მომსახურების სააგენტოს შრომის ბაზრის მართვის საინფორმაციო სისტემაში (www.worknet.gov.ge) რეგისტრირებული სამუშაოს მაძიებელია.
პაატა ლომაძე, „ჯიპიაი ჰოლდინგის“ გენერალური დირექტორი: „ ჯიპიაი ჰოლდინგის“ დასაქმების ფორუმი იყო შანსი ნებისმიერი შრომისმოყვარე, აქტიური და მონდომებული ადამიანისთვის დაეწყოთ კარიერა ლიდერ სადაზღვევო კომპანიაში. როგორც შედეგიდანაც ჩანს 212-მა მიზანდასახულმა სამუშაოს მაძიებელმა ეს შანსი გამოიყენა და ახლა ისინი დასაქმების პარალელურად, ახალ პროფესიას ეუფლებიან. ვფიქრობ, ჩვენი დასაქმების პროექტი ძალიან მნიშვნელვანია იმ თვალსაზრისითაც, რომ ძირითადად საშუალო ასაკის ადამიანები დავასაქმეთ, მიუხედავად სამუშაო გამოცდილებისა ან სპეციფიური ცოდნისა. გვიხარია რომ „ჯიპიაი ჰოლდინგის“ დასაქმების ფორუმი საჯარო და კერძო სექტორის წარმატებული თანამშრომლობის კიდევ ერთი მაგალითია.“
ჯანდაცვის სამინისტრომ უზრუნველყო „ჯიპიაი ჰოლდინგი“-ს მიერ მოთხოვნილი კვალიფიკაციის შესაბამისი შრომის ბაზრის მართვის საინფორმაციო სისტემაში (www.worknet.gov.ge) რეგისტრირებული სამუშაოს მაძიებლების „ჯიპიაი ჰოლდინგი“-სათვის გაგზავნა. სამინისტროს ამოცანაა სოციალური მომსახურების სააგენტოს შრომის ბაზრის მართვის საინფორმაციო სისტემაში (www.worknet.gov.ge) რეგისტრირებული სამუშაოს მაძიებლების სტაჟირებისა და დასაქმების ხელშეწყობა.