საქართველოს სახალხო დამცველი ტელეკომპანია „მაესტროს“ მიერ საიას სოციალური რეკლამის ეთერში განთავსებაზე უარის შესახებ განცხადებას ავრცელებს, რომელსაც უცვლელად გთავაზობთ:
საქართველოს სახალხო დამცველი ეხმიანება არასამთავრობო ორგანიზაციების მიერ გავრცელებულ განცხადებას, რომლის თანახმად, ტელეკომპანია „მაესტრომ“ უარი განაცხადა, ეთერში განეთავსებინა საქართველოს ახალგაზრდა იურისტთა ასოციაციის (საია) მიერ მომზადებული სოციალური რეკლამა. ტელეკომპანია „მაესტროს“ მიერ საიასთვის გაგზავნილ წერილში აღნიშნულია, რომ სოციალური რეკლამის განთავსებაზე უარის თქმის საფუძველს „მაესტროსა“ და საიას შორის ბოლო დროს განვითარებული მოვლენები წარმოადგენს. განცხადების თანახმად, ტელეკომპანიის უარს საფუძვლად დაედო რამდენიმე დღის წინ „მაესტროს“ მისამართით გამოთქმული კრიტიკა, როდესაც ტელეკომპანიის მიერ 32 თანამშრომლისთვის შრომითი ურთიერთობის შეჩერება საიამ შეაფასა როგორც უკანონო.
საქართველოს სახალხო დამცველი მიიჩნევს, რომ ტელეკომპანია „მაესტროს“ მიერ საია-სთვის უარის თქმა კანონით გარანტირებული უფლებით სარგებლობაზე განპირობებულია საია-ს მიერ გამოთქმული მოსაზრების გამო, რაც წარმოადგენს განსხვავებულ მოპყრობას განსხვავებული აზრის ნიშნით.
საქართველოს სახალხო დამცველი აღნიშნავს, რომ დემოკრატიული საზოგადოების და, მათ შორის, არასამთავრობო სექტორის ფუნქციონირების ერთ-ერთი ძირეულ პრინციპსა და უმნიშვნელოვანეს ფუნქციას სწორედ საზოგადოებისთვის აქტუალური საკითხების შესახებ აზრის გამოხატვა და კრიტიკა წარმოადგენს, მათ შორის ისეთის, რომელიც შესაძლოა ცალკეული პირებისთვის მიუღებელი იყოს.
„მაუწყებლობის შესახებ“ საქართველოს კანონის 65-ე მუხლის პირველი პუნქტი მაუწყებელს ავალდებულებს წარმოდგენილი სოციალური რეკლამა უსასყიდლოდ და არადისკრიმინაციულად განათავსოს ეთერში.
ზემოაღნიშნულიდან გამომდინარე, საქართველოს სახალხო დამცველი მოუწოდებს ტელეკომპანია „მაესტროს“, აღმოფხვრას დისკრიმინაციული მიდგომა და, კანონით გათვალისწინებული ვალდებულების შესაბამისად, განათავსოს ეთერში საიას მიერ მომზადებული სოციალური რეკლამა.
* აღსანიშნავია, რომ სოციალური რეკლამა ეხება ადრეული ქორწინების პრობლემას, რომელიც ჩვენი ქვეყნისთვის ერთ-ერთ მნიშვნელოვან გამოწვევას წარმოადგენს და აუცილებელია ამ კუთხით საზოგადოების ცნობიერების ამაღლება.