თბილისის მუნიციპალიტეტის საკრებულოს ფრაქციის ,,ერთიანი ნაციონალური მოძრაობა“ თავმჯდომარემ სევდია უგრეხელიძემ ორგანიზაციის ,,კონსტიტუციის 42-ე მუხლი“ წარმომადგენელთან ერთად ბრიფინგი გამართა.
დეპუტატმა ორგანიზაციების ,,კონსტიტუციის 42-ე მუხლი“ და ,,ახალგაზრდა იურისტთა ასოციაცია“ მიერ შემუშავებული პროექტი წარადგინა, რომელიც 2015 წლის 13-14 ივნისს მომხდარი სტიქიის შედეგად დაზარალებულ პირთა საცხოვრისით უზრუნველყოფის, უძრავი ქონების დათმობისა და სხვა სახის ფულადი დახმარების გაცემის წესში ცვლილების შეტანას გულისხმობს.
სევდია უგრეხელიძის განცხადებით, სტიქიით დაზარალებულთა შორის არიან ოჯახები, რომლთა საცხოვრებელი ტერიტორია 2010 წლის 21 ივნისის პრეზიდენტის N 435 განკარგულებით სარეკრეაციო ზონაში მოექცა, რის გამოც აღნიშნული პირები არ იქნენ მიჩნეულნი მოსარგებლეებად.
აქედან გამომდინარე, მათზე დაზარალებულთა მესამე ჯგუფისთვის გათვალისწინებული დახმარება არ გაცემულა.
,,მიმაჩნია, რომ აღნიშნული გარემოება არ უნდა გახდეს ფაქტობრივად დამდგარი ზიანის უგულვებელყოფის საფუძველი“, - განაცხადა სევდია უგრეხელიძემ და არასამთავრობო ორგანიზაციების მიერ შემუშავებულ პროექტს ,,ერთიანი ნაციონალური მოძრაობის“ ფრაქციების სახელით დაუჭირა მხარი.
